Ссылки доступа

Эрон Россияга самолёт қисмлари ва жиҳозларини етказиб беради


Эрон Россияга ўз ҳудудида ишлаб чиқарилган самолётлар ва ускуналар учун эҳтиёт қисмлар экспорт қилади.

Шунингдек, Эрон таъмирлаш марказлари томонидан Россия самолётларига таъмирлаш ва техник хизмат кўрсатиш ва техник ёрдам кўрсатиш бўйича келишувга эришилди.

Бу ҳақда Эрон ОАВлари, хусусан, ИРНА ва МEҲР агентликлари Эрон фуқаро авиацияси ташкилоти раҳбарининг Россия транспорт вазири ўринбосари билан бўлган учрашуви натижаларига таяниб хабар бермоқда.

Қайд этилганидек, 26 июль куни Теҳронда бўлиб ўтган музокараларда Муҳаммад Муҳаммадий-Бахш ва Россия вакили ҳаво транспорти соҳасида ҳамкорликни кенгайтириш зарурлигини таъкидлаб, икки давлат ўртасидаги йўловчи қатновларини ҳафтасига 35 тага етказиш бўйича келишувга эришилган эди. Икки давлат авиакомпанияларининг юк рейсларини парвозлар частотасига чекловсиз амалга ошириш ҳуқуқи ҳам қайд этилган.

Музокаралар ҳақида Россия ахборот агентликлари ҳам хабар берди. «ТАСС»нинг қайд этишича, учрашув иштирокчилари икки томонлама алоқаларни кенгайтириш йўлларини муҳокама қилган ва ўзаро англашув меморандуми имзоланган.

19 июль куни Россия президенти Владимир Путин музокаралар учун Эронга жўнаб кетди. Унинг учун бу Украина босқинидан кейин собиқ СССР давлатларидан ташқаридаги биринчи ташриф эди.

АҚШ президенти маъмурияти шу ой бошида Эрон Россияга "тезлаштирилган вақт оралиғида" юзлаб жанговар учувчисиз самолётларни сотишга тайёрланаётганини, бунинг учун россиялик расмийлар ўтган ой давомида республиканинг марказий қисмидаги аэродромга қайта-қайта ташриф буюрганини айтди. Бу маълумот Теҳронда инкор этилди, деб ёзади «Коммерсант» газетаси.

Февраль ойи охирида Россия ҳарбийларининг Украинага бостириб кириши бошланганидан сўнг, кўплаб давлатлар, хусусан, Европа Иттифоқи давлатлари, Буюк Британия, АҚШ, Канада ҳаво кенгликларини Россия авиакомпанияларининг самолётлари учун ёпди.

Украинага қарши тажовуз туфайли жорий этилган Ғарбнинг Москвага қарши санкциялари Россия авиакомпанияларига самолётлар, эҳтиёт қисмлар ва жиҳозларни сотишни тақиқлайди. Бундан ташқари, Россия авиакомпаниялари томонидан ижарага олинган авиалайнерларга эга бўлган компаниялар ушбу самолётларни ишлатиш учун лицензияларни бекор қилиб, уларни қайтаришни талаб қилмоқдалар.

Эронга келсак, у кўп йиллардан буён ўзининг ядровий дастури ва ядровий қурол яратишга уринишлари билан боғлиқ жиддий халқаро санкциялар остида. Чекловлар, жумладан, Эрон авиациясининг ҳолатига таъсир кўрсатди.

XS
SM
MD
LG