Вазирлар Маҳкамасининг веб-сайтида «Қимор ўйинлари фаолиятига лицензия берганлик учун йиғим белгилаш тўғрисида»ги қарор лойиҳаси жамоатчилик муҳокамаси учун эълон қилинди.
Республика аҳамиятига молик шаҳарлардаги (Бишкек ва Ўш) казинолар, онлайн казинолар ва электрон (виртуал) казинолар учун 84 миллион сомга (1 миллион доллардан ортиқ) лицензия бериш таклиф қилинмоқда. Ўш, Чуй ва Жалол-Обод вилоятларида худди шундай қимор ўйинлари учун лицензия нархи 42 миллион сом, Боткен, Норин, Иссиқкўл ва Талас вилоятларида эса 25 миллион 200 минг сом миқдорида белгиланиши таклиф қилинмоқда.
Бутун мамлакат бўйлаб ўйин автоматлари заллари учун лицензияларни 42 миллион сомга, букмекерлик идоралари ва лотереялар учун 10,5 миллион сомга сотиш таклиф қилинмоқда.
Иқтисодиёт вазирлиги бундай нархлар аввал тузилган идоралараро ишчи гуруҳда муҳокамадан сўнг таклиф этилганини таъкидлади.
Ўтган ой охирида Жогорку Кенеш депутатлари жанжал билан казиноларни қонунийлаштириш тўғрисидаги қонун лойиҳасини қабул қилган эди. Шундан сўнг Бишкекда норозилик митинги бўлиб ўтди, унинг иштирокчилари ҳужжатни имзоламаслик талаби билан президент Садир Жапаровга мурожаат қилишди. 1 июль куни давлат раҳбари ушбу қонунни имзолагани маълум бўлди.
Қонун Қирғизистон фуқаролари ва 21 ёшга тўлмаган хорижликларнинг қимор ўйингоҳларига боришини тақиқлайди.