Reuters агентлигининг хабар беришича, шифокорнинг жасади иш жойидан топилган. У ўлимидан олдин ёзиб қолдирган хатида таҳдидлардан чарчаганини, шунинг учун жонига қасд қилаётганини айтган.
Австрия президенти Александр ван дер Беллен аҳолини нафрат ва таҳдидларга қарши бирлашишга чақирди. Соғлиқни сақлаш вазири Йоханнес Раух шифокорнинг ўлими нафратнинг янада кучайишига эмас, балки унинг йўқолишига олиб келиши шарт, деб фикр билдирди.
Келлермайр оммавий ахборот воситалари орқали аҳолини коронавирусга қарши курашишга ва вакцина олишга чақириб келган. Унинг чиқишлари COVID-диссидент деб аталувчи гуруҳлар томонидан кескин танқид қилиб келинган. Гуруҳ аъзолари дастлаб унга интернет орқали руҳий ҳужумлар уюштиришган, кейинроқ эса иш жойига бориб турли таҳдидларни қилишган.
Австрия шифокорлар ассоциацияси кўплаб тиббиёт ходимлари вакцинацияга қарши чиқаётганларнинг таҳдидларига учраганини билдирган.
Австрия ғарбий Европа давлатлари орасида коронавирусга қарши эмланганлар сони бўйича энг охирги ўринда. Ўтган ойда ҳукумат катта ёшдагиларни мажбурий эмалаш режасидан воз кечди. Социологларнинг билдиришларича, вакцинация мажбурий бўлган тақдирда ҳам аҳолининг камида 13 фоизи ундан воз кечган бўлар эди.
Австрияда вакцинацияга қарши чиққанларнинг таҳдидлари остида қолган шифокор Лиза-Мария Келлермайр ўз жонига қасд қилди.