Гастроль Россияда бир нечта бекор қилинган концертлардан сўнг бўлиб ўтади. "Сиз мусиқани бекор қила олмайсиз! Бу аниқ. “Бекор қилинмаган тур”дан сўнг, интернет орқали, нима бўлганда ҳам, тўхтамасликка ўзимга ваъда бердим. Ва сиз учун катта янгилик: мен гастроль сафарига кетяпман!, деб ёзди Манижа ўзининг Facebook саҳифасида.
Манижа урушга қарши позицияси туфайли Россияда чиқишлари тақиқланган мусиқачилар рўйхатига киритилган. Россия оммавий ахборот воситаларининг хабарларига кўра, ушбу рўйхатга «ДДТ», «Би-2», «Ногу свело» гуруҳлари, қўшиқчилар Земфира, Монеточка, Гречка, Дора ва бошқа ижрочилар киритилган. Эслатиб ўтамиз, 24 февраль куни Манижа Инстаграмда қора фонда пост жойлаштирган ва Россия ва Украина ўртасидаги ҳар қандай уруш “биродарларни ўлдириш” эканлигини ёзган эди.
8 октябрь куни Манижанинг она шаҳри Душанбеда катта концерти бўлиб ўтади.
Маълум қилинишича, гастроль давомидаги концертлардан тушган маблағнинг бир қисми хонанда онаси билан бирга ташкил этган «СИЛСИЛА» оғир аҳволдаги одамларни қўллаб-қувватлаш ва ҳимоя қилиш жамғармасига юборилади.
Манижа асли тожикистонлик машҳур қўшиқчи бўлиб, соул ва этно услубидаги қўшиқларни ижро этади.
2021 йилда Манижа "Рус аёли" қўшиғи билан «Eurovision» да Россияни ҳимоя қилди. Замонавий аёл учун ўз йўлидан бориш қанчалик муҳимлиги ҳақидаги қўшиқ «Eurovision» руҳига мос эди, аммо Россия жамиятининг бир қисми Тожикистонда туғилган киши "рус аёли" номидан куйлаганидан ғазабланди. Танлов финалида Манижа 9-ўринни эгаллади.
2020 йил охиридан бери Манижа Бирлашган Миллатлар Ташкилотининг Қочқинлар бўйича Олий комиссарлиги бошқармасининг яхши ният элчиси бўлиб келган.