— Ўқитувчилар шанба куни дам олишлари ва фарзандлари билан бўлишлари керак, деб ҳисоблаймиз. Бу мактаб директорлари ва бош ўқитувчилари, ўқитувчилари ва барча ходимларга тааллуқлидир, - деди Аймагамбетов ўқитувчиларнинг республика август конференциясида.
Шунингдек, у беш кунлик тренинг ўқитувчиларнинг таътил вақтига таъсир қилмаслигига аниқлик киритди. Таътил вақти - 56 кун ва ўзгаришсиз қолади.
Аввалроқ Халқ таълими вазирлиги жорий ўқув йилидан таълим қозоқ тилида олиб бориладиган мактабларнинг биринчи синфларида фақат қозоқ тили ўқитилиши ҳақида маълум қилганди. Таълим рус тилида олиб бориладиган синфларда давлат ва рус тиллари бўлади. Таълим қозоқ тилида олиб бориладиган мактабларда иккинчи синфдан бошлаб рус тилини ўрганиш бошланади. Барча мактабларда 3 синфдан бошлаб инглиз тили ўқитилади.
16 август куни Қозоғистон ҳукумати Таълим вазирлигининг ушбу қарорини қўллаб-қувватлади.
Бир кун аввал Таълим вазирлиги мактабларда янги ўқув йилини икки ҳафтага узайтиришни маъқуллагани ҳам маълум бўлди. Биринчи синф ўқувчилари учун 35 ўқув ҳафтаси (илгари 33 ҳафта), 2-11 синфларда 36 ўқув ҳафтаси (илгари 34 ҳафта) бўлади. Ўқув йили 31 майда якунланиши режалаштирилган (илгари 25 майда тугарди). Ёзги таътил 1 июндан 1 сентябргача давом этади.