Ссылки доступа

Венгрия ЕИдан Алишер Усмонов дохил россиялик уч олигархни санкция рўйхатидан ўчиришни сўради


Венгрия Европа Иттифоқидан россиялик тадбиркорлар Алишер Усмонов, Пётр Авен ва Виктор Рашниковни санкция рўйхатидан чиқариб ташлашни сўрамоқда. Бу ҳақда Politico нашри хабар қилди.

Бунинг эвазига Будапешт Украина ҳудудига бостириб кирган Россияга қарши киритилмиш санкциялар муддатини узайтиришга бундан буён қаршилик қилмасликни ваъда қилди.

Европа Иттифоқи 15 сентябргача Москвага қарши санкциялар муддатини яна ярим йилга узайтириш ҳақида қарор қабул қилиши керак. 7 сентябрь куни бу масала ЕИга аъзо мамлакатлар элчилари ўртасида муҳокама қилинади.

ЕИнинг барча аъзолари розилиги билангина қабул қилиниши мумкин бўлган санкция рўйхатида ҳозирда 1217 жисмоний шахс ҳамда 108 та юридик шахс номи бор.

Алишер Усмонов ва Пётр Авен февраль ойи охиридан бери ЕИ санкциялар рўйхатида турибди. Ўшанда ЕИ расмий журнали Усмоновни “Россия президенти Владимир Путин билан жуда яқин алоқага эга кремлпараст олигарх” деб атаган. Иддаога кўра, Алишер Усмонов Путиннинг ишбилармонлик билан алоқадор муаммоларини ҳал қилиш билан шуғулланади.

Авен ҳам Кремлга яқин ва Путин билан доимий равишда учрашиб турадиган россиялик 50 чоғли бизнесмендан бири экани айтилган. Брюссель фикрича, у президент [Путин] иродасидан ҳоли равишда ҳаракат қилолмайди.

Виктор Рашников эса санкция рўйхатига энг йирик солиқ тўловчилардан бири бўлмиш Магнитогорск металлургия комбинати хўжайини сифатида киритилган.

Озод Европа/Озодлик (RFE/RL) медиакорпорацияси уч олигарх масаласида Будапешт расмийларидан изоҳ сўради, бироқ бу сўровга Венгрия расмийларидан ҳали ҳеч ким жавоб берганича йўқ.

XS
SM
MD
LG