Ссылки доступа

Қирғизистон парламенти педофиллар учун ўлим жазосини жорий этишни таклиф қилди


Жогорку Кенешнинг 7 сентябрь куни бўлиб ўтган йиғилишида бир қатор депутатлар Қадамжой вилоятида мактаб ўқувчисининг зўрланганига муносабат билдирди ва педофилларга нисбатан жазони кучайтириш тарафдори эканлигини билдирди.

Депутат Ирисбек Атажанов йиғилишга Ички ишлар вазирлиги раҳбариятини таклиф этиб, мазкур ҳолат юзасидан ахборот тинглашни таклиф қилди.

“Бу миллий фожиа ва бу биринчи марта содир бўлаётгани йўқ. Биз педофиллар учун ўлим жазосини жорий этиш бўйича қатъий қадамлар қўйишимиз керак. Келинг, комиссия тузиб, қонунчиликка ўзгартириш киритиш масаласини кўриб чиқайлик”, — деди депутат.

Депутатлар Алишер Қўзуев ва Тазабек Икромов ҳам шу мавзуда сўзга чиқиб, қонунчиликка ўзгартишлар киритиш зарурлигини таъкидладилар, депутат Чўлпон Султонбекова Вазирлар Маҳкамаси билан биргаликда болаларни ҳимоя қилиш мавзусида “ҳукумат куни” ўтказиш ва қонунларга ўзгартиш ва қўшимчаларни муҳокама қилишни таклиф қилди.

Парламент аъзоси Марлен Маматалиев ҳамкасбларига яқинда қабул қилинган қонунга кўра, болаларга нисбатан зўравонлик учун жазо кучайтирилганини эслатди.

“Яхши қонун қабул қилдик, зўрлаганлар учун узоқ муддат қамоқ жазоси назарда тутилган, улар амнистия ёки муддатидан олдин озодликка чиқиш ҳуқуқига эга эмас, биз ҳам умрбод қамоқ жазосини белгилаганмиз. Вазирлар Маҳкамасини таклиф қилиб, мазкур қонун ижроси қай тарзда амалга оширилаётгани ҳақида маълумот эшитишни таклиф қиламан. Биз қатлни ҳам белгилашимиз мумкин эди, лекин Конституция бунга йўл қўймайди, имкон қадар жазони кучайтиришга ҳаракат қилдик”, — деди Маматалиев.

4 сентябрь куни Ўш-Раззоқов автомобиль йўлининг Нооғардон қишлоғида сел туннель ичидан 14 ёшли қизнинг жасади топилди. Унинг ўлдирилишида гумон қилиниб, Қадамжой вилоятининг 1997, 1998 ва 1995 йилларда туғилган уч нафар фуқароси қўлга олинди.

Боткен вилояти ИИБ хабарига кўра, воқеа жойига етиб келган милиция ходимлари қизнинг қўллари боғлангани, бўйнида арқон билан бўғиш излари борлигини аниқлаган.

Президент Садир Жапаров ўқувчи қизнинг ўлдирилиши фактига изоҳ бериб, бу иш унинг шахсий назоратида эканини таъкидлади. Бош прокуратура гумонланувчилар умрбод қамоқ жазосига ҳукм қилиниши мумкинлиги ҳақида хабар берди.

XS
SM
MD
LG