Ссылки доступа

FT: АҚШ ва ЕИ Россияга қарши санкциялар борасида Туркияга босимни кучайтирмоқда


Қўшма Штатлар ва Европа Иттифоқи Россияга нисбатан санкцияларга риоя қилиниши бўйича Туркияга босимни кучайтиряпти, деб ёзди Financial Times ўз манбаларидан олинган маълумотларга таянган ҳолда.

Нашр суҳбатдошларига кўра, Вашингтон Россиянинг “Мир” тўлов тизими билан ишлатган Туркия банкларига эътибор қаратмоқчи. Брюссель эса туркиялик амалдорлар билан ўз хавотирларини тўғридан-тўғри муҳокама қилиш ниятида.

Аввалроқ сайёҳлик агентликлари Туркияда Россия пластик карталарига хизмат кўрсатишда узилишлар юзага келаётгани ҳақида маълум қилишган. Уларга кўра, Туркия Марказий банкининг иккиламчи санкциялар тўғрисидаги огоҳлантиришларидан кейин айрим банклар “Мир” тизими билан ишлашни тўхтатган.

Россия Тўлов карталари миллий тизими бош директори Владимир Комлев ТАСС агентлиги билан суҳбатда “Мир” тизими Туркияда аввалгидек ишлаётганини билдирган. Комлев Туркиядаги айрим молия институтлари санкция остига тушган Россия банклари томонидан берилган карталар бўйича хизмат кўрсатмаётганини эътироф этган.

Ғарб мамлакатлари Москвага қарши санкцияларни Россия қўшинларининг Украина ҳудудига бостириб кирганига жавобан киритган. Бунинг ортидан Visa, MasterCard ва American Express тўлов тизимлари дохил минглаб халқаро ширкат Россияда ўз фаолиятини тўхтатган.

Украинани дастаклаётганига қарамай, Туркия Кремлга қарши киритилган санкцияларга қўшилган эмас. Шу билан бирга, Анқара санкцияларни айланиб ўтишда воситачига айланмаслигини билдирган.

XS
SM
MD
LG