АҚШ дипломатик миссияси Россия ҳукуматининг Украинага асоссиз босқинини қўллаб-қувватлаш учун ўз ҳарбий ресурсларини сафарбар қилишини эълон қилиши натижасида Қозоғистонга кириб келаётган Россия фуқаролари сони ортганидан хабардор эканини маълум қилди.
“АҚШнинг Остонадаги элчихонаси ва Олмаотадаги АҚШ бош консуллиги бошпана ёки қочқин мақомини олиш учун аризаларни қабул қилиш ҳуқуқига эга эмас. Бошпана изловчилар, агар улар жисмонан Қўшма Штатларда бўлса ва АҚШ фуқароси бўлмаса, бошпана сўраши мумкин” - дейилади АҚШ дипломатик миссияси баёнотида.
Бошпана олиш ҳақидаги аризалар АҚШ Фуқаролик ва Иммиграция Хизмати томонидан кўриб чиқилади, шу муносабат билан дипломатик миссия потенциал аризачиларга қўшимча маълумот олиш учун улар билан боғланишни тавсия қилади.
АҚШ Қочқинларни қабул қилиш дастури Бирлашган Миллатлар Ташкилотининг Қочқинлар бўйича агентлиги ва бутун дунё бўйлаб ҳамкор ННТлар билан ҳамкорликда йўлланмаларни қабул қилади ва таъқибдан қочиб, ҳимояга муҳтож, айниқса заиф шахсларни АҚШга жойлаштиришни ташкил қилади.
Дипломатик миссия, шунингдек, Қозоғистон ҳукуматига “иммиграция сиёсати ва чет эл фуқароларининг Қозоғистонга кириши билан боғлиқ ҳар қандай масалалар бўйича” мурожаат қилишни тавсия қилди.
Бир кун аввал Оқ уй сафарбарликдан қочган россияликлар АҚШдан бошпана олиши мумкинлигини айтган эди. Оқ уй матбуот котиби Карине Жан-Пернинг айтишича, урушда қатнашишни истамаган ва Владимир Путин эълон қилган сафарбарликдан яширинган Россия фуқаролари АҚШдан бошпана сўраши мумкин.
Ўтган ҳафта Россиядан келган қуруқликдаги чегара ўтиш жойларида эълон қилинган сафарбарликдан сўнг, одамларнинг навбатда туриши, ҳаво ва темир йўл чипталари нархининг кескин ошиши қайд этилди. 21 сентябрдан 27 сентябргача Қозоғистонга 98 минг россиялик келган, 64 минг киши мамлакатни тарк этган, деб хабар қилди 27 сентябрь куни ИИВ.