“Фронтдаги вазиятнинг кескинлашуви ҳамда бутун Украина бўйлаб ракета ва артиллерия зарбаларининг давом этиши эҳтимоли юқорилигидан келиб чиқиб, ватандошларимиздан шахсий хавфсизлик нуқтаи назаридан ушбу мамлакатни тарк этишларини сўраймиз”, дейилган элчихона баёнотида.
Киевдаги дипломатлар, шунингдек, ракета ҳужумлари кучайиши ортидан ўзбекистонликларни “зиддият ўз изига тушгунига қадар” Украинага сафар қилишдан тийилишга чақирган.
Украина шаҳарлари 10 октябрь тонгидан буён россиялик ҳарбийлар томонидан учирилган шиддатли ракета зарбаларига нишон бўлаётгани ҳақида Озодлик аввалроқ хабар қилган. Сўнгги маълумотларга кўра, ракета ва дрон ҳужумлари натижасида камида 19 киши ҳалок бўлиб, 105 киши тан жароҳати олган.
Ўзбекистоннинг Киевдаги элчихонаси Украинадаги ватандошлардан мамлакатни тарк этишни сўради.