Улар ўз талабларини оммавий ахборот воситаларининг хориждан молиялаштирилиши билан изоҳладилар.
Намойишчилар қўлларида “Озодликни тўхтат”, “Озодликни ёп” ва бошқа ёзувлар ёзилган плакатларни ушлаб туришган. Ўзини Илимбек Исроилов деб таништирган митинг модератори журналистларга берган интервьюсида Қирғизистонда фақат давлат ОАВлари ёки .kg доменига эга нашрлар ишлаши кераклигини айтди.
Бундан ташқари, митинг иштирокчилари бошқа ОАВ – Kloop ва Кактус Медиага қарши шиорлар айтишди ва хорижий агентлар тўғрисидаги қонун қабул қилинишини талаб қилишди.
Намойиш содир бўлган жойда полиция ходимлари навбатчилик қилишган.
Аввалроқ парламентда депутат Жанарбек Акаев мустақил матбуотни қўллаб-қувватлаб, сиёсатчилар ва арбобларни журналистлар, блогерлар ва нашрларни туҳмат қилишни бас қилишга, уларнинг фаолиятига аралашмасликка чақирган эди. Бундан ташқари, у оммавий ахборот воситаларига қарши намойишларни молиялаштиришни тўхтатишга чақирди.