Миссия Украина Қуролли Кучлари, жумладан, ЕИга аъзо давлатлар ҳудудидаги ҳудудий мудофаа кучлари учун индивидуал, жамоавий ва ихтисослаштирилган тайёргарликдан ўтади.
“Миссиянинг мақсади Украинанинг халқаро тан олинган чегаралари доирасида ҳудудий яхлитлигини ҳимоя қилиш, суверенитетини самарали амалга ошириш ва ўз давлатларини ҳимоя қилиш учун Украина Қуролли Кучларининг ҳарбий амалиётларини самарали ўтказиш учун ҳарбий салоҳиятини оширишга ҳисса қўшишдир”, - дейилади Европа Иттифоқи кенгаши баёнотида.
Миссиянинг тезкор штаб-квартираси Брюсселда очилади ва уни Мудофаани режалаштириш ва операциялар кучлари директори вице-адмирал Эрве Блежан бошқаради. ЕИ Кенгаши баёнотида қайд этилганидек, миссияда Европа Иттифоқига аъзо давлатлар, шунингдек, бошқа халқаро ҳамкорлар иштирок этади. Хусусан, миссия Буюк Британия, АҚШ ва Канададаги Украинанинг бошқа ҳарбий ўқув марказлари билан ҳамкорликда иш олиб боради.
Миссия иши дастлаб икки йилга мўлжалланган. Ташкилотнинг ушбу давр учун бюджети 106,7 миллион евро миқдорида келишилган.
Европа Иттифоқи кенгаши Украинага қурол сотиб олиш учун 500 миллион евро ажратишни ҳам маъқуллади. Буни инобатга олган ҳолда, Европа Тинчлик Жамғармаси доирасидаги олтинчи транш, Европа Иттифоқининг Украинага ёрдам кўрсатишдаги ҳиссаси 3,1 миллиард еврони ташкил қилади.
Янги траншдан 490 миллион евро ҳарбий техника сотиб олишга, 10 миллион евро эса Украина ҳарбийлари учун шахсий ҳимоя воситалари, биринчи тиббий ёрдам қутилари ва ёқилғи сотиб олишга сарфланади. Ажратилган маблағлар, ЕИ Кенгашида кўрсатилгандек, ЕИга аъзо давлатлар аллақачон Украинага топширган ҳарбий техникани таъмирлаш ва техник хизмат кўрсатиш учун ҳам ишлатилади.
Эслатиб ўтамиз, аввалроқ АҚШ президенти Жо Байден Украинага хавфсизлик ва мудофаа соҳасида ёрдам бериш учун АҚШ мудофаа бюджетидан 725 миллион доллар олиб чиқишга кўрсатма берган эди.
Янги ёрдам пакетига ҳарбий техника ва ўқ-дорилар, жумладан, HARM юқори тезликдаги радарга қарши ракеталари, HIMARIS тизимлари учун қўшимча ўқ-дорилар ва икки миллиондан ортиқ ўқ-дорилар киради. Бундан ташқари, Қўшма Штатлар Украинага тиббий буюмлар юборади ва ҳарбий тайёргарликда ёрдам беради.
2022 йил бошидан бери Қўшма Штатлар Украинага 50 миллиард доллардан ортиқ маблағ ажратди, шундан деярли 27 миллиард доллари тўғридан-тўғри ҳарбий эҳтиёжлар учун.
Аввалроқ, Британия NASAMS қурилмалари учун зенит-ракеталарни Украинага топширишини маълум қилганди. Франция ўзининг ҳаво мудофаа тизимини етказиб беришини эълон қилди. Канада қарийб 35 миллион доллар миқдорида ҳарбий ёрдам ажратилишини эълон қилди.
Шунингдек, 13 октябрь куни Европа Кенгаши Парламент Ассамблеяси Россия Федерациясини террористик режим деб атаган ва ўз ҳудудини ҳимоя қилиш учун Украинага қурол етказиб беришни давом эттиришга чақирувчи резолюция қабул қилган.