Ссылки доступа

Душанбеда фуқаролик фаоли Фаромуз Иргашев устидан маҳкама бошланди


Фаромуз Иргашев

Душанбеда "Комиссия 44" адвокати, Тожикистонда 2020 йилги президентлик сайловларида рўйхатга олинмаган номзод Фаромуз Иргашев устидан суд жараёни бошланди. Бу ҳақда Озоди радиосига Иргашевнинг яқинлари хабар бериб, маҳкама тергов изоляторида ёпиқ эшиклар ортида ўтаётганини таъкидлади.

Тоғли Бадахшон мухтор вилояти халқ депутатлари мажлисининг собиқ депутати 32 ёшли Фаромуз Иргашев шу йилнинг май ойида Хоруғ шаҳрида қўлга олинган эди. Июнь ойи бошида у ва яна олти нафар фуқаролик фаоли – “Комиссия 44” аъзолари Душанбега олиб кетилган.

Фаромуз Иргашев ва бошқа ҳибсга олинган фаоллар, Озоди радиоси манбаларига кўра, хориждан молиявий ёрдам олаётганликда, рухсат этилмаган митинг уюштирганликда ва жиноий уюшмада қатнашганликда гумон қилинмоқда.

Фаромуз Иргашеванинг онаси Оламбегим Иргашева 19 октябрь куни Озоди радиосига у суд мажлисига таклиф қилинмаганини айтди. Расмийлар унга маҳкама ёпиқ эшиклар ортида ўтаётгани ҳақида хабар беришди.

“Ўғлим билан тергов изоляторида фақат бир марта – 5 август куни қўриқчилар иштирокида гаплашганман. Фаромуз адолат сўраб давлат органларига мурожаат қилмасликни сўради. Мен ундан қўйилган айблар ва жиноят иши материаллари ҳақида сўрадим. Бунга жавобан у ўзи ҳеч нарсани билмаслигини айтди”, - дейди фаолнинг онаси.

Оламбегим Иргашеванинг айтишича, Фаромуз давлат адвокати этиб тайинланган, у шу вақт ичида у билан фақат бир марта боғланган.

7 октябрь куни Тожикистон Бош прокуратураси ТБМВдаги май воқеаларидан кейин 77 киши “лойиқ жазо” олгани, яна ўнлаб бу вилоят аҳолисининг иши судда кўриб чиқилаётгани ҳақида хабар берди.

«Комиссия 44» 2021 йил ноябрь воқеалари чоғида Хоруғ шаҳрида ТБМВдаги фуқаролик жамияти фаоллари орасидан ташкил этилган бўлиб, улар намойишчилар ва маҳаллий ҳокимият органлари ўртасида воситачилик қилган ва намойишнинг тўхтатилишига ҳисса қўшган. Улардан 6 нафари ноябрь ойида Хоруғдаги воқеаларни тергов қилиш бўйича тергов гуруҳига киритилган.

Тожикистон Олий суди август ойида «Комиссия 44»ни “жиноят жамоаси” деб тан олди. “Комиссия 44”нинг камида етти нафар аъзоси май ойи охирида Хоруғдаги хавфсизлик кучлари операциясидан сўнг қўлга олинган ва Душанбега олиб кетилган. Улардан икки нафари 18 йиллик қамоқ жазосини олди. Ҳуқуқ ҳимоячилари ва маҳбусларнинг яқинлари уларни бегуноҳ деб ҳисоблаб, улар ўз ҳуқуқлари ва Тоғли Бадахшон аҳолиси ҳуқуқларини ҳимоя қилганликларини айтишмоқда.

XS
SM
MD
LG