Расман билдирилишича, Хоразм вилояти “Чорванасл” марказининг Урганч тумани етакчи мутахассиси Т.М., фуқаро Н.,нинг фермер хўжалигига тегишли 50 гектар ерни ҳокимлик захирасига қайтариб олиб, кейинчалик унинг номига янги фермер хўжалиги ташкил этиб, ушбу ерни қайта расмийлаштириб бериш эвазига 80 000 доллар талаб қилган.
Мутахассис фермердан талаб қилинган пулнинг 60 минг долларини олаётганида Бош прокуратура ҳузуридаги Департамент ҳамда ДХХнинг Хоразм вилоят бошқармаси ҳамкорликда ўтказган тадбир доирасида қўлга олинди.
Дастлабки терговда Т.М., пулнинг бир қисмини Урганч туман ҳокимининг қишлоқ ва сув хўжалиги масалалари бўйича ўринбосари Р.А., га бериши лозимлигини айтган. Шундан сўнг тезкор тадбир давом эттирилган ва ҳоким ўринбосари ўз уйида Т.М.,дан 43 минг долларни олаётганида ушланди.
“Мазкур ҳолат юзасидан Жиноят кодексининг 210-моддаси (пора олиш) билан жиноят иши қўзғатилиб, тергов ҳаракатлар ўтказилмоқда”, дейилади хабарда.
Сўнгги бир йилда Ўзбекистонда қатор туманларда ҳоким ўринбосарлари катта миқдорда пора олаётганда қўлга тушгани хабар қилинди.
Сирдарё вилоят Оқолтин тумани ҳокимининг ўринбосарларидан бири 500 доллар пора олаётган пайтда ушлангани тўғрисида ДХХ ахборот хизмати 18 июль куни хабар берди.
Февралда Миришкор тумани ҳокимининг муовини ер ажратиб бериш эвазига тадбиркордан 80 минг доллар пора талаб қилиб, шундан 50 минг АҚШ долларини олган вақтида қўлга олинган.
Шунингдек, февраль ойида Чинозда туман ҳокимининг иқтисодий масалалар бўйича биринчи ўринбосари 35 гектар ер майдонини сотиш ва ҳужжатларни туман ҳокимлиги орқали расмийлаштириб бериш эвазига келишилган 90 минг доллардан 40 минг долларини олган вақтида қўлга тушган эди.
Урганч тумани ҳокимининг қишлоқ ва сув хўжалиги масалалари бўйича ўринбосари Р.А., ўз уйида 43 минг доллар пора олаётганида ушланди, деб хабар берди 25 октябрь куни Бош прокуратура ҳузуридаги Департамент.