Бу ҳақда Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков АОКАда ўтказилган брифингда маълум қилди.
Қайд этилишича, 23 ноябрь ҳолатига коронавирус билан касалланганлар сони 245 665 нафарни ташкил этиб, улардан 243 234 нафари (99,1 фоиз) соғайган, 1637 нафари (0,6 фоиз) вафот этди. Сўнгги 7 кунликда стационарга ётқизилган беморлар сони 482 нафарни, даволаниб чиққанлар сони 358 нафарни ташкил қилди.
«Сўнгги 14 кунлик таҳлилда касалликнинг тарқалганлик даражаси 2,0 ни (ЖССТ экспертлари хулосасига кўра бу кўрсаткич 1,0 гача бўлса вазият барқарорлигини англатади) ташкил этмоқда. Ҳозирда COVID-19`ни даволашга ихтисослашган шифохоналарда 539 нафар беморлар қолмоқда, уй шароитида даволанаётганлар эса 187 нафар», — деди Нурмат Отабеков.
Унинг сўзларига кўра, мамлакатда грипп ва ўткир респиратор инфекциялар 2022−2023 йиллар куз-қиш мавсумида коронавирус инфекцияси билан микс-инфекция касаллиги сифатида, айнан эмланмаган аҳоли ҳамда сурункали касалликлари мавжуд бўлган фуқаролар ўртасида қайд этилиши кузатилмоқда.
«Санитария-эпидемиология хизмати томонидан тегишли вазирлик ва идоралар билан биргаликда профилактик ва эпидемияга қарши чора-тадбирларни амалга ошириш давом эттирилмоқда ва эпидемик вазият тўлиқ назорат остига олинган», — дея таъкидлади у.
Аввалроқ Ўзбекистонда сўнгги бир ҳафта ичида коронавирус инфекцияси аниқланганлар сони яна ошиб бораётгани хабар қилинганди. Соғлиқни сақлаш вазирлиги матбуот хизмати хабарига кўра, 24 ноябрь, пайшанба куни 98 нафар фуқарода касалланиш қайд этилди.