Оның сөзінше, қамаудағы екі адам 4 желтоқсанға қараған түні асылып қалған.
"Тергеу басталды. Алдын ала тексеру нәтижесі бойынша, қаза болғандардың денесінде зорлық белгілері жоқ, таза. Сот-медициналық экспертиза нақты қорытындысын шығарады", - деді Камолидинов.
Ресми мәліметке сәйкес, Баткен облысы Кадамжай ауданында 14 жастағы қыздың өліміне күдікті ретінде төрт адам ұсталып, оның үшеуі Оштағы №5 тергеу абақтысына аударылған. Күдіктілердің тағы біреуі Жалалабад облысындағы кәмелетке жасы толмағандарға арналған абақтыға жіберілген.
Биыл 5 қыркүйекте Кадамжай ауданында 14 жастағы қыздың денесі табылған. Оның өліміне күдікті ретінде 24, 25 және 27 жастағы ер адамдар ұсталған. 8 қыркүйекте қыздың өліміне байланысты кәмелетке жасы толмаған бір адам ұсталған.
Қараша айында олардың қамаудағы мерзімі 2023 жылдың 4 қаңтарына дейін ұзартылған.