Бу ҳақда 8 декабрь куни Қирғизистон президенти Садир Жапаров ва Хитой Халқ Республикаси Давлат кенгаши бош вазири ўринбосари Ху Чунхуа ўртасидаги учрашувда маълум бўлди.
Қирғизистон Республикаси Президенти маъмуриятининг хабар беришича, томонлар сиёсий, савдо-иқтисодий ва маданий-гуманитар ҳамкорлик доирасида қирғиз-хитой муносабатларини янада мустаҳкамлашнинг долзарб масалалари юзасидан фикр алмашган. Унинг сўзларига кўра, Садир Жапаров «Хитой-Қирғизистон-Ўзбекистон» темир йўли қурилиши лойиҳаси бутун минтақанинг иқтисодий ривожланишига бебаҳо ижобий таъсир кўрсатишини ва Хитой раиси Си Цзинпиннинг “Бир камар, бир йўл"” ташаббусини амалга оширишда муҳим бўғинга айланишини таъкидлади.
Ху Чунхуа, ўз навбатида, ўзаро боғлиқлик соҳасидаги ҳамкорликни мустаҳкамлаш муҳимлигини таъкидлаб, уч томон “Хитой-Қирғизистон-Ўзбекистон темир йўли лойиҳасини фаол илгари суради, шу орқали мамлакатлар ўртасидаги узлуксиз савдо-иқтисодий ҳамкорликни таъминлайди” деган умидда эканини таъкидлади.
Шу йилнинг сентябрь ойида Самарқандда бўлиб ўтган ШҲТ саммитида Қирғизистон Республикаси ҳудудида Хитой-Қирғизистон-Ўзбекистон темир йўли қурилиши лойиҳаси бўйича ҳамкорлик тўғрисидаги уч томонлама шартнома имзоланган эди. Келишувларга кўра, темир йўл Торугарт – Арпа – Макмал – Жалолобод йўналиши бўйлаб ҳаракатланади.
Хитой темир йўл қурилиш корпорациясининг Лойиҳа-қидирув институти Хитой-Қирғизистон-Ўзбекистон темир йўлининг техник-иқтисодий асосларини ишлаб чиқишни 2023 йил апрель ойида якунлаш режалаштирилганини маълум қилди.