Тошкент шаҳар транспорт ва йўл-транспорт инфратузилмасини ривожлантириш бош бошқармасининг 15 декабрь куни кечқурун маълум қилишича, 13 декабрда президент Шавкат Мирзиёев Тошкентдаги 18-автобус паркида бўлганидан сўнг пойтахтдаги транспорт хизматини яхшилаш борасида кўрсатма берган ва шундан сўнг жамоат транспорти муаммоларини ҳал қилиш учун идоралараро тезкор штаб ташкил қилинган.
14 декабрь куни пойтахтга 20 та MAN A22 русумидаги катта сиғимли автобуслар келтирилган. 15 декабрь куни эса кичик ҳажмдаги юзта Isuzu автобуслари олиб келинган. Бундан ташқари ИИВ Тошкент автопаркларига яна 30 та Isuzu автобусларини тақдим қилган.
“Газета уз”нинг хабар қилишича, президентнинг 2017 йил 1 декабрдаги қарорига асосан 2018 йилнинг мартидан Ўзбекистонда имконияти чекланган шахсларга мослаштирилмаган жамоат транспортини сотиб олиш тақиқланган.
“Isuzu мидибуслари нафақат ногирон шахсларга, балки аҳолининг кам ҳаракатланувчи тоифасига ҳам мослаштирилмаган”, дейилади “Газета уз” хабарида.
Тошкент шаҳар транспорт ва йўл-транспорт инфратузилмасини ривожлантириш бош бошқармасининг билдиришича, президент танқидидан сўнг 15 декабрда Тошкент кўчаларига 944 та автобус чиқарилди. Бу 14 декабрдагидан 75 тага кўпдир.
16 декабрь куни мингта автобус йўналишларга чиқиши режалаштирилган.
Президент Шавкат Мирзиёев Тошкент транспорт тизимини танқид қилгани ортидан пойтахтга 14-15 декабрь кунлари 120 та автобус олиб келинди. Улардан 100 таси президент фармони билан 2018 йилда тақиқланган Isuzu русумидаги кичик автобуслардир.