Борейко бұл хатты чаттардың бірінен алған, кейін Козачков адвокатымен сөйлесіп, үндеуді қамаудағы журналист жазғанын растаған.
Хатта журналист "рейдерлікке, ұйымдасқан қылмысқа қатысты, бұған қоса мемлекеттік құпияны жинап, оны таратты деп айыпталғанын" жазды. Мемлекеттік құпияға қатысты бапқа тоқталған автор мұндай айыптауға адвокаттарды аңдыған ҚМА қызметкерлері туралы ақпарат негіз болуы мүмкін деп топшылады.
"Оның жеке басы туралы мәлімет ашық дереккөздерде бар, оны алу үшін ешқандай құпия базаны бұзған жоқпын. Ал "рейдерлік" пен "Ұйымдасқан қылмыстық топ" баптары - "Есентай сити" мен басқа да нысандар төңірегіндегі ең шулы дауға қатысты. Бір түсінгенім, ақша жымқырды деп айыпталған Алмас Әбдіғаппаровтың қылмыстық ісі туралы мақала жазғаным үшін "қылмыскер атансам" керек", - деп жазылған бұл хатта.
Одан соң автор "неге екені белгісіз, тергеушілер мен прокурорларды, судьяларды рейдерлік жасады деп айыптамайды да, бұл туралы бірнеше мақала жазған журналисті изоляторға тастайды" деп жазған.
"Оны түсіндіруге дайынмын. Шын мәнінде менің қамалуым - ҚМА жетекшісі Жанат Елимановтың кек алуы", - деп мәлімдеді Козачков.
Агенттік басшысы Жанат Елимановтың журналист Михаил Козачков атынан жарияланған хатқа пікірі қандай екені әзірге белгісіз.
18 желтоқсанда кешке қаржы мониторингі агенттігі журналист Михаил Козачков ұсталғанын хабарлады.
Жексенбі күні агенттік таратқан хабарламада журналистің "Болат Назарбаевтың көмекшісімен байланысты қылмыстық топқа рейдерлік жасауына көмектесті" деген күдікке ілінгені жазылған.
Хабарламада "қылмыстық топтың бірнеше өкілінің" аты аталады. Онда журналистің "қоғамдық пікір қалыптастыруға көмектескені", "ақпараттық шабуылға үлес қосқаны", "БАҚ заңын бұзып, жалған мәліметтерді, банк, отбасылық, басқа да заңмен қорғалатын құпия деректерді таратқаны", адамдардың "беделін түсіретін мақалалар жариялағаны" жазылған. Ведомство қазіргі кезде тергеу жалғасып жатқанын айтқан.
19 желтоқсанда "Әділ сөз" құқық қорғау ұйымы Қазақстан президенті Қасым-Жомарт Тоқаевқа үндеу жолдады. Ұйым Қазақстанның қаржы мониторингі агенттігінің қызметкерлері ұстаған белгілі журналист Михаил Козачковтың конституциялық құқығы өрескел бұзылды деп есептейді.