Акцияда 70 га яқин киши иштирок этди. Кампиробод иши бўйича ҳибсга олинганлардан бири Али Шабданнинг рафиқаси Нурайим Сидигалиева Озодлик билан суҳбатда тергов изоляторидаги фаоллар ва сиёсатчиларнинг яқинлари президент Садир Жапаров билан учрашишни талаб қилаётганини айтди.
“Эримнинг аҳволи яхши эмас. Бугун биз президент билан учрашишни талаб қилиб йиғилганмиз. Қариндошларимизнинг аҳволидан хавотирдамиз, тергов изолятори шифокорлари томонидан ҳеч қандай муносабат билдирилмаётганидан хавотирдамиз. Биз ҳаммани уй қамоғига қўйиб юборишни талаб қиламиз”, деди фаол Али Шабданнинг рафиқаси.
Бундан ташқари, Сидигалиева давлат раҳбарига ушбу иш бўйича айбланувчилар ҳақида "нотўғри маълумот" берилган бўлиши мумкинлигини қўшимча қилди.
“Президентнинг сўнгги интервьюларига асосланиб, менимча, унга очиқдан-очиқ ёлғон гапиришмоқда. Ҳуқуқ-тартибот идоралари ходимлари ҳибсга олинганлар таҳдиди ҳақида айтишлари мумкин эди. Шундай қилиб, рейтинги тез тушиб бораётган президентнинг ўзини обрўсизлантиришади. У Конституциянинг кафолати ҳисобланади. Агар судлар ва Ички ишлар вазирлиги қонунни бузса, йиғилишда ҳаммасини президентга билдирмоқчимиз”, — деди Сидигалиева.
Октябрь ойида Бишкекда 30 га яқин сиёсатчи ва фаол “оммавий тартибсизликлар уюштиришга тайёргарлик кўрган”ликда гумон қилиниб ҳибсга олинган эди. Суд уларни икки ойга қамоққа олди, декабрь ойида эҳтиёт чораси яна икки ойга узайтирилди.
Суд қарорига норозилик сифатида ишдаги 19 нафар айбланувчи очлик эълон қилди. Айрим маҳбусларнинг адвокатлари ва Омбудсман институти вакиллари айрим маҳбусларнинг соғлиғи билан боғлиқ муаммолар борлигини айтишмоқда.
Ҳибсга олинганларнинг ўзлари жиноят ишини Кампиробод сув омбори ерларини Ўзбекистонга бериш ва уни ҳимоя қилиш қўмитаси тузиш борасидаги позицияси учун сиёсий таъқиб, деб ҳисобламоқда.
17 декабрь куни «Хабар» давлат нашрига берган интервьюсида Садир Жапаров Кампиаробод иши бўйича изоҳ берар экан, “бугунги кунда ҳибсга олинганларнинг 90 фоиздан ортиғи чегара масаласи бўйича ёпиқ муҳокамаларда бир неча бор қатнашган ва вазиятни билган. Кампиробод масаласи Қирғизистон Республикаси фойдасига ҳал қилинган” деди. Президентнинг сўзларига кўра, қўлга олинганлар “халқни безовта қилган” ва “давлат тўнтариши” уюштиришга уринган.