"Полиция бәріне бірдей тұрақты тұруға рұқсат бермейді. Ол үшін банк есеп-шотында кемінде 4,5 миллион теңге ақшасы, тұрақты жұмысы және бұрын сотталмаған болуы тиіс. Құқық қорғау органдары жан-жақты тексерген соң барып, тұрақты тұруға рұқсат береді",- деп атап өтті ІІМ миграция қызметі комитетінің өкілі Аслан Аталықов.
Ол Қазақстан азаматтығын алғысы келетін шетел азаматы елде кемінде бес жыл тұруы тиіс деді. Бұл талап қандастарға немесе қазақстандыққа тұрмысқа шыққан әйелдерге тиесілі емес.
ІІМ мәліметінше, 2022 жылы Қазақстанға 5,6 млн шетелдік кірген, оның 2,9 млн-ы ресейлік. Қыркүйек айында тәулігіне 30 мыңға дейін ресейлік шекарадан өткен. 1 қазаннан бері Ресейден келушілер тәулігіне 6-7 мыңнан аспайды.
Қазақстан арқылы Өзбекстанға 47 мың, Қырғызстанға 46 мың, Түркияға 37 мың, БАӘ-ге 19 мың ресейлік шығып кеткен.
Өткен аптада еңбек министрлігі жанындағы миграция комитеті жыл басынан бері Қазақстанға үш млн-ға жуық ресейлік келгенін мәлімдеген.
Желтоқсан айындағы мәлімет бойынша, Қазақстанда 298 мыңға жуық ресейлік бар. Оның 30 мыңы осында жұмыс істейді, уақытша тұруға рұқсат алған.
21 қыркүйекте Ресей президенті Владимир Путин елінде мобилизация жариялаған. Содан кейін ресейліктер қазақ-орыс шекарасы арқылы Қазақстанға қашты. Қазақстанның Ресеймен шектесетін барлық шекара бекеттерінде ұзын-сонар кезек пайда болды.