Қайд этилишича, душанба тонгида пойтахтдан парвоз қилган Uzbekistan Airways авиаширкатига қарашли учоқ 146 нафар йўловчини Термизга олиб келган.
Термиз халқаро аэропорти жорий йилнинг 1 ноябридан 25 декабригача ёпилиши ҳақида Озодлик аввалроқ хабар қилган.
Қарийб икки ойлик танаффус вақтида аэропортда узунлиги 3000 метр ва эни 60 метр бўлган янги учиш-қўниш йўлаги, юриш йўлаклари ва учта самолёт тўхташ жойи учун перронни ўз ичига олган, янги 4E тоифали аэродром мажмуаси қурилгани айтилмоқда.
“Шунингдек, аэродромга замонавий CAT-I ICAO ёритиш ускуналари тизими, метеорологик ва радионавигация қўниш тизимлари ўрнатилган. Янги аэродром мажмуасини қуриш лойиҳаси 550 миллиард сўмга баҳоланмоқда. Айни пайтда 377 миллиард сўмлик ишлар бажарилган”, дейилган хабарномада лойиҳанинг якуний босқичи — учта самолёт турар жойи ва иккинчи юриш йўлаги 2023 йил апрелигача якунланиши режалангани қўшимча қилинган.
Реконструкциядан чиққан Термиз халқаро аэропорти 26 декабрь куни Тошкентдан учган илк учоқни қабул қилди. Бу ҳақда Uzbekistan Airports матбуот хизмати маълумот тарқатди.