Бу хабар Эрон ва халқаро ахборот воситаларининг эътиборини тортди.
Эроннинг Хабарварзеши ва Этемад сайтлари томонидан чоп этилган турнирдан олинган суратда эронлик шахматчи боши очиқ ҳолда тасвирланган. Хабарварзеши спортчининг рўмол ўраган суратини ҳам эълон қилди, бироқ сурат қаерда олинганига аниқлик киритмади.
Хадемнинг ўзи Инстаграмдаги саҳифасида турнирдаги иштироки ҳақида ҳозирча изоҳ бермаган. Хадемнинг турнирда рўмолсиз чиқиши Эронда сентябрь ойи ўрталарида “ҳижобни нотўғри кийгани учун” маъанавият полицияси томонидан ҳибсга олинган 22 ёшли Маҳси Аминининг ўлимидан сўнг бошланган норозилик намойишлари фонида юз берди.
25 ёшли Сара Хадем аш-Шарий чемпионатда Эрон терма жамоасидаги ягона аёл бўлди, деб хабар беради Озодликнинг Эрон нашри. Сара Хадем 18 ёшида аёллар гроссмейстер ва халқаро уста унвонларини қўлга киритган биринчи эронлик шахматчидир.
Октябрь ойида эронлик Элназ Рекаби Сеулда бўлиб ўтган Осиё чемпионатида яланг боши билан чиқиш қилган, бироқ кейинчалик ижтимоий тармоқларда тоққа чиқиш деворига ҳижобсиз кирганини «бехосдан» дея даъво қилган, деб хабар берди Reuters.
Декабрь бошида Эрон Амини ўлимидан кейин бошланган ҳукуматга қарши намойишлар иштирокчисига нисбатан иккинчи ўлим жазосини ижро этгани ҳақида хабар берилган эди. Эронда икки ойлик намойишларда юзлаб одамлар ҳалок бўлди, 15 мингга яқин киши ҳибсга олинди. Шунингдек, намойишлар қаттиқ бостирилгани, полиция ҳарбий қурол ишлатгани, бироқ одамлар кўчаларга чиқишда давом этгани маълум қилинган.