Маълумотларга кўра, мазкур қарорлар ортидан Қорақалпоғистон Республикаси, Тошкент шаҳри ва вилояти, Андижон , Бухоро, Наманган, Сурхондарё ва Хоразм вилоятларидаги таълим муассасаларида III чорак дарс машғулотлари кейинги ҳафтанинг душанба кунидан бошланади.
Бу орада Мактабгача ва мактаб таълими вазирлиги об-ҳаво шароити барқарорлашгунига қадар ўқувчиларни вақтинча онлайн таълим тизимига ўтказиш масаласи кўриб чиқилаётганини билдирган.
Аввалроқ Ўзбекистон ҳудудларида об-ҳаво шароити барқарор бўлмагани важидан мактаб ва ОТМларда қишки таътил муддати бир неча бор кўчирилган, бу борада берилган пала-партиш қарорлар ижтимоий тармоқларда ота-оналар ва ўқитувчилар норозилигига сабаб бўлган эди.
Ўзбекистоннинг айрим ҳудудларида маҳаллий расмийлар аномал совуқ туфайли қишки таътил муддатини жорий йилнинг 23 январигача узайтиришга қарор қилишган.