“Улар қариндошларини топиш учун келишди. Элчихона анчадан бери бизни аҳмоқ қилиб ўйнатиб юрибди. Бизнинг яқинларимиз озод бўлсин. Жавоб берсинлар - қариндошларимиз қаерда? Онам қани, икки укам қани? Дарҳол жавоб беришсин! Элчи, чиқ!” – деб йиғилганлардан бири Акикат Калиолла қичқирди.
Шунингдек, у Хитойнинг Олмаотадаги консуллиги олдида намойишлар бошланганига 700 кундан ортиқ вақт ўтганини айтди.
Элчихона яқинига полиция етиб келган. Намойишчилар элчихона эшигини тақиллатди, бироқ уларнинг олдига ҳеч ким чиқмади. Олмаотадан келган одамлар “элчихонадан жавоб олмасалар, шу ерда тунаб қолишларини” айтишган.
Намойишчилар элчихонага кирмоқчи бўлган, бироқ полиция уларнинг йўлини тўсиб қўйган. Остона шаҳрининг Олмаота вилояти маъмурияти вакили йиғилганлар олдида сўзга чиқиб, “Хитой элчихонаси уларни қабул қилишга мажбур эмаслигини” айтиб, Ташқи ишлар вазирлигига боришни маслаҳат берди. Намойишчилар бунга рози бўлишмади ва туришда давом этишди. Бироз вақт ўтгач, уларни элчихона ҳудудига киритишди.
Байболат Кунбўлатулининг айтишича, уларни бинога киритишган, лекин улар ҳалигача ички эшикдан ўтишмаган.
Шинжондаги ўз оилалари билан бирлашишни талаб қилган этник қозоқлар 2021 йил февралидан бери Олмаотадаги Хитой консуллиги олдида муддатсиз норозилик намойишлари ўтказмоқда. Ўтган йилнинг сўнгги ойларида полиция иштирокчиларга консуллик дарвозасига яқинлашишга рухсат бермаган.
Ҳаракатлар давомида хитойлик дипломатлар намойишчилар олдига чиқмади, улар элчихона ёки консулликда қабул қилинмади. Хитойнинг Қозоғистондаги элчиси Чжан Сяо 2021 йил март ойида Шинжонда қўлга олинганлар “Хитой фуқаролари” эканлигини ва “Хитой қонунларини бузганини” айтди. Намойишчилар хитойлик дипломатнинг бу баёнотини кескин қоралаб, уни мамлакатдан чиқариб юборишни талаб қилишди.
Баъзи намойишчилар "тинч йиғилишлар тартибини бузганлик"да айбланиб ҳибсга олинди, кўплари жаримага тортилди, уларнинг умумий миқдори, уларга кўра, бир неча миллион тенгега етади.