Озодликнинг рус хизмати хабарига кўра, даставвал мазкур хат Останкино округи муниципал депутати Сергей Цукасов томонидан эълон қилинган. Ўз ҳамкасбларини мазкур хатни имзолашга чақирган Цукасов номада Навальнийни жисмоний ва руҳий жиҳатдан таҳқирлашни бас қилиш, уни жарима изоляторига қамашни ва унга нисбатан асоссиз интизомий чоралар кўрилишини тўхтатишга, мухолифатчига тиббий ёрдам кўрсатишга, уни фуқаровий касалхонага кўчиришга чақирган.
Натижада орадан бир сутка ўтар-ўтмас хат остига Москва, Петербург шаҳарлари, Ленинград, Тула, Новосибирск ва Томск вилоятлари ҳамда Краснодар ўлкасидан бўлган ўнлаб депутат имзо чеккан.
Аввалроқ россиялик врачлар ва адвокатлар ҳам Навальнийни таҳқирлашни бас қилиш талаби билан президент Путинга очиқ хат билан мурожаат қилишганди.
Владимир вилоятидаги қаттиқ режимли колонияда жазо муддатини ўтаётган Алексей Навальний 31 декабрь куни ўнинчи марта жарима изоляторига йўлланган эди. Изоляторда Навальний ўткир респиратор вирусли инфекцияга чалинган, бироқ унга тиббий ёрдам кўрсатилган эмас. Мухолифатчининг сафдошлари томонидан сотиб олинган дори-дармонларнинг бир қисми россиялик врачларнинг Путинга очиқ хатидан кейингина колонияга киритилган.
Навальний Владимирдаги колонияда 2022 йилнинг июнь ойида буён ўтирибди. Мухолифатчига нисбатан қўшимча жазо чоралари у колонияда маҳкумлар касаба уюшмасини тузишга қарор қилганини очиқлагани ортидан қўлланила бошлаган.
Россиялик 80 дан ортиқ депутат қамоқдаги мухолифатчи Алексей Навальнийни дастаклаш учун мамлакат президенти, бош прокурори ва президент ҳузуридаги инсон ҳуқуқлари кенгаши номига ёзилган хатга қўл қўйишган.