Тегишли қарор 27 январь куни шаҳар кенгаши томонидан қабул қилинган. «Газета.uz» манбалари хабар беришича, собиқ ҳокимнинг ўзи ваколатини тугатишни сўраб ариза ёзган.
Қонунчиликка кўра, сенатор ва кенгаш депутати ваколат муддати давомида дахлсизлик ҳуқуқига эга.
Жаҳонгир Ортиқхўжаев 2020 йил январь ойида ЎзЛиДеП партиясидан 48-сайлов округидан Кенгаш депутати, сўнгра беш йиллик муддатга сенатор этиб сайланган эди. Унинг ваколат муддати 2025 йилнинг январигача ҳисобланган.
16 январь куни президент Шавкат Мирзиёев ўтказган энергия таъминотига доир йиғилишда Тошкент шаҳрини 2018 йилдан бери бошқариб келган Жаҳонгир Ортиқхўжаев лавозимдан бўшатилгани очиқланди.
Истеъфога пойтахт ҳокимининг қиш мавсумига лозим даражада тайёргарлик кўрмагани, фақат ёлғон маълумот бериб, пастга тушмагани сабаб ўлароқ кўрсатилди.
Жаҳонгир Ортиқхўжаев 2018 йилнинг апрель ойи охиридан буён Тошкент шаҳар ҳокими лавозимида ишлаб келаётган эди.