30 январь куни чоп этилган TI ҳисоботида айтилишича, Тожикистон ҳукумати коррупцияга барҳам бериш учун зарур ислоҳотларни амалга оширмаяпти, суд ва ҳуқуқ-тартибот идоралари фаолияти эса ноаниқлигича қолмоқда.
Тожикистон расмийларининг Transparency International ташкилотининг янги ҳисоботига муносабати ҳозирча кузатилмаган. Аввалроқ Тожикистон Давлат молиявий назорати ва коррупцияга қарши кураш агентлиги маълум қилганидек, 2022 йилнинг 9 ойи давомида Таълим ва фан вазирлиги муассасаларида, Душанбе халқаро аэропортида ҳамда энергетика соҳасида ўтказилган аудит ва текширишлар натижасида, жами 76 миллион сомоний зарар аниқланган.
Коррупция индекси 180 мамлакатда баҳоланади. Унда ишбилармон доиралар ва экспертлар ўртасидаги сўровлар асос қилиб олинади. Янги ҳисоботда таҳлилчилар авторитар давлатлар коррупциядан демократик давлатларга таъсир ўтказиш учун ташқи сиёсат воситаси сифатида тобора кўпроқ фойдаланаётганини қайд этади.
Transparency International ташкилотининг Берлиндаги ваколатхонасининг Марказий Осиё бўйича маслаҳатчиси Олтинай Мирзабекова 31 январь куни Тожикистон коррупцияни идрок этиш бўйича янги индексда Афғонистон, Камбоджа, Марказий Африка Республикаси, Гватемала, Ливан ва Нигерия билан бирга 150-ўринда қолганини айтди. Унинг сўзларига кўра, мамлакат 100 балллик тизимда 24 балл тўплаган, бунда 0 — коррупциянинг максимал даражаси, 100 — унинг йўқлиги. Ўтган йили эълон қилинган ҳисоботда Тожикистон 25 балл тўплаган ва бу мамлакатда коррупция одатий ҳолга айланганидан далолат беради, дейди Мирзабекова. Унинг сўзларига кўра, “Сўнгги йилларда Тожикистонда авторитаризм кучаймоқда, ҳукумат коррупцияга қарши курашиш учун зарур ислоҳотларни амалга оширмаяпти”.
Transparency Internationalнинг Марказий Осиё бўйича маслаҳатчиси Тожикистондаги коррупция “чуқур тизимли” эканлигини ва бунинг далили “суд ва ҳуқуқ-тартибот идоралари фаолиятида мустақиллик йўқлиги”, “давлат органлари фаолиятидаги шаффофлик ва ҳақиқий коррупциянинг йўқлиги” эканини айтади.