Елдің төтенше жағдайлар және азаматтық қорғаныс комитетінің төраға орынбасары Имомали Иброхимзоданың айтуынша, апатты аймаққа 50 құтқарушы жіберіледі.
Түркияның Тәжікстандағы елшісі Умут Аджардың сөзінше, тәжік билігі бұдан бөлек 10 тонна азық-түлік және қажетті заттар тиелген гуманитарлық көмек жөнелтетінін айтқан.
6 ақпанға қараған түні Түркияда жойқын жер сілкінісі болды.
Соңғы мәлімет бойынша зілзаладан қаза тапқандар саны 3549-ға жеткен. 22 мыңнан астам адам жараланған. Анкараға 65 ел көмек көрсетуге дайын екенін білдірді. Қазақстан да Түркияға құтқарушылар жіберді.
Ақпанның 6-сы күнгі жер сілкінісі осы ғасырда Түркияда болған аса ірі зілзала саналады. Ердоған оны "1939 жылдан кейін қайталанған аса ірі табиғи апат" деп атады. Дүйсенбі күні магнитудасы 7,7-ге тең жерасты дүмпуі тағы қайталанған. Дүмпу Грузия, Армения, Ливан, Иранда да сезілген.