13 февраль куни эрталаб Экибастуз-Агадир электр узатиш линияси ўчирилди, бу эса Олмаота, Жамбил, Туркистон, Қизилўрда, Қарағанда вилоятлари, шунингдек, янги ташкил этилган Жетису вилоятида электр таъминотида чекловларга олиб келди, деб хабар беради Informburo.kz.
“13 февраль куни соат 09.23 да 500 кВли Л-5170 Экибастуз - Агадир электр узатиш линияси технологик ҳимоя чоралари натижасида ўчирилди. Бу Олмаота, Жамбил, Жетису, Туркистон, Қизилўрда, Қарағанда вилоятларида энергия таъминотида 600 МВтга (истеъмолнинг қарийб 10 фоизи) чекланишига олиб келди”, — дея хабар бермоқда KEGOC матбуот хизмати.
– Айни пайтда ўчирилган истеъмолчиларни электр энергияси билан таъминлашни тиклаш мақсадида жанубий ҳудуддаги электр станцияларини тўлиқ юклаш ишлари олиб борилмоқда. Электр узатиш линиясидаги бузилишларни аниқлаш ва бартараф этиш мақсадида таъмирлаш бригадаларининг жўнаб кетиши ташкил этилди”, — дея хулоса қилди KEGOC.
Кейинроқ Энергетика вазирлиги матбуот хизмати фақат саноат корхоналарида электр таъминотидаги узилишлар бўлганини маълум қилди. “Соат 12:00 ҳолатига кўра, энергия таъминотидаги чекловда фақат саноат корхоналари қолмоқда: «Казфосфат» МЧЖ, «Арселормиттал» АЖ, “Казакҳмис Корпорацияси” МЧЖ”, — дейилади матбуот хизмати хабарида.
Сўнгги икки йил ичида Қозоғистон электр энергияси тақчиллигидан кўпроқ шикоят қила бошлади. Расмийлар тақчилликни аҳоли ва корхоналар томонидан электр энергияси истеъмолининг кўпайиши, энергетика инфратузилмасининг эскирганлиги билан боғлашди.
Февраль ойи бошида ҳукумат Энергетика вазирлигига “электр энергияси тақчиллигини бартараф этиш бўйича” шошилинч чоралар кўриш бўйича топшириқ берган эди.