Мазкур қонунда собиқ президент Назарбоев ва унинг оиласига умрбод имтиёзлар берилган эди, жумладан, уларни давлат бюджети ҳисобидан таъминлаш ва тансоқчилар бериш назарда тутилганди.
Назарбоев, шунингдек, ўзига тегишли кўчмас мулк даҳлсизлигидан, унинг яқинлари эса шахсий даҳлсизликдан маҳрум этилди.
Қозоғистонни 28 йил бошқарган Нурсултон Назарбоев 2019 йилнинг мартида президентликдан истеъфо берган эди. Аммо у Қозоғистон халқлар ассамблеяси раиси ва Хавфсизлик кенгаши раиси лавозимларини сақлаб қолганди.
Ўтган йилнинг январида Назарбоев ҳокимиятига қарши норозилик намойишлари оммавий тартибсизликларга айланиб кетгани ортидан собиқ президент ўз позицияларини бой берди.
Парламент Назарбоевнинг умрбод Хавфсизлик кенгаши ва Халқлар ассамблеясига раислик қилиши тўғрисидаги қонунни бекор қилди.
Бундан ташқари пойтахт Нур-Султон номи яна Астана деб ўзгартирилди. Биринчи президент куни расмий давлат байрамлари рўйхатидан чиқарилди. Назарбоевнинг жияни Кайрат Сатибалди давлат маблағларини талон-торож қилганликда айбланиб олти йилга қамалди. Катта қизи Дариға Назарбоева эса парламент қуйи палатаси депутати ваколатини топширди.