Бу ҳақда президент матбуот хизмати маълумот тарқатди.
Хабарномада қайд этилишича, депутатлар жамоатчилик томонидан юборилган 200 мингдан ортиқ таклифларни ўрганиб чиқишган, бунда халқаро тажриба ҳам инобатга олинган.
Ўрганишлар натижасида Конституцияга ўзгартиш ва қўшимчалар киритиш тўғрисидаги қонун лойиҳасининг якуний таҳрири тайёрланган.
“Мазкур қонун лойиҳасида ижтимоий-иқтисодий, сиёсий ва давлат бошқаруви соҳаларига оид ўта муҳим ўзгаришлар акс этгани сабабли қонун лойиҳасини референдумга қўйишдан аввал депутатлар Ўзбекистон Республикаси Конституциясининг 83-моддасида белгиланган қонунчилик ташаббусига эга субъектлар билан маслаҳатлашувлар ўтказмоқда”, дейилган хабарномада эндиликда қонун лойиҳаси Конституциявий суд томонидан алоҳида кўриб чиқилиши ва хулоса берилиши, маслаҳатлашувлар эса давом этиши қайд қилинган.
Конституцияга киритиладиган ўзгартишлар лойиҳаси ўтган йилнинг 25 июнида эълон қилинган ва умумхалқ муҳокамасига 10 кун берилган эди. Аммо 1-2 июль кунлари Конституциянинг янги таҳририда Қорақалпоғистон мақомининг бекор қилинишига қарши Нукусда зўравонликларга айланиб кетган намойишлар ортидан Олий Мажлис муҳокама муддатини яна 10 кунга, ундан кейин эса 1 августга қадар узайтирган.
Президент Шавкат Мирзиёев 2022 йилнинг октябрь ойи бошида Сирдарё вилоятида бўлиб ўтган йиғилишда сўзлай туриб, “Конституцияга ўзгартиришлар киритишда шошилишнинг ҳожати йўқлиги”ни таъкидлаган.
Мазкур қонун тайёр бўлганидан кейин мамлакат конституциясини ўзгартириш бўйича референдум ўтказилиши айтилган. Ҳозиргача расмий санаси эълон қилинмаган референдум президентлик муддатини 5 йилдан 7 йилга узайтириши кутилади.
Ўзбекистон президенти Шавкат Мирзиёев 6 март куни Олий Мажлис Қонунчилик палатаси депутатлари, сенаторлар ва Олий суд раҳбарияти билан учрашиб, Конституцияга ўзгартиш ва қўшимчалар киритиш юзасидан келиб тушган таклифлар бўйича маслаҳатлашув ўтказган.