Бош прокуратура 1995 йилда туғилган Андрей Ш., Миробод тумани, Буюк Турон кўчаси, 75-уйнинг еттинчи қаватида жойлашган хонадондан “ўзини пастга ташлаб, вафот этган”, деб ҳисоблайди.
Текшириш доирасида суд-тиббий экспертизаси тайинланган. Шунингдек, содир бўлган ҳодисанинг сабаблари аниқланмоқда.
Бу сўнгги ўн кунда Тошкентда Россия фуқаролари билан боғлиқ иккинчи ўлимдир. Бундан аввал россиялик 36 ёшли журналист Александр Нечаев Тошкентдаги хонадонлардан бирида ўлик ҳолда топилган эди.
Бош прокуратура 9 март куни Нечаев ўлимига юрак хасталиги сабаб бўлганини билдирган.
“Суд-тиббиёт экспертизасининг дастлабки хулосасига кўра, А.Нечаевнинг ўлими "сурункали юрак-ўпка етишмовчилиги, юракнинг сурункали ишемик касаллиги"дан келиб чиққан. А.Нечаевнинг танаси кўздан кечирилганда тан жароҳатлари аниқланмаган. Текшириш давом этмоқда”, дейилади расмий билдирувда.
Тошкентда Россия фуқароси еттинчи қаватдан қулаб ҳалок бўлди
Тошкентда Россия фуқароси Андрей Ш., еттинчи қаватдан қулаб, ҳалок бўлди. Бош прокуратуранинг билдиришича, ҳодиса 13 март куни тахминан соат 18:30 ларда содир бўлди.