АҚШ федерал судьяси жорий йилнинг 26 январь куни асли ўзбекистонлик Сайфулло Соиповни беш йил муқаддам Нью-Йорк шаҳрининг Манҳэттен мавзеида велойўлакда одамларни юк машинаси билан уриб юборганликда айбдор деб топган ва ҳукм март ойида эълон қилинишини билдирганди.
Қўшма Штатларга 2010 йилда кўчиб борган 35 ёшли Сайфулло Соипов қотиллик, одам ўлдиришга қасдланганлик ва “Исломий давлат” экстремистик гуруҳига моддий ёрдам кўрсатганлик каби жами 28 модда бўйича айбдор деб топилган.
2017 йилнинг 31 октябрида содир этилган ҳужум оқибатида саккиз киши нобуд бўлган, яна 12 киши жароҳат олган эди.
Ўшанда Соипов ҳужумни ижарага олинган юк машинасида амалга оширган. У Нью-Йорк марказидаги кўчада ёппасига 20 кишининг устига юк машинасини ҳайдаган эди. Жароҳатланганлар орасида тана аъзоларидан айрилган, руҳан ва жисмонан ногирон бўлиб қолганлар бор.
Reuters ахборот агентлиги 26 январь куни айбдор деб топилган Сайфулло Соиповга нисбатан ҳакамлар ҳайъати 6 февраль куни ўлим жазосини қўллаш тўғрисида қарор қабул қилиши кутилаётганини ёзганди.
Президент Жо Байден маъмурияти ўлим жазосини бекор қилиш тарафдори эканини расман билдирган. Шунинг учун ҳакамлар ҳайъати ўлим жазоси тўғрисида қарор чиқарса бу Жо Байден бошқаруви чоғида федерал даражада илк ўлим ҳукми бўлиши мумкин эди.
Соиповнинг адвокатлари суддан Нью-Йорк прокуратурасини ўз мижозига нисбатан ўлим жазосини талаб қилиш имкониятидан маҳрум қилишни сўраган.
Нью-Йоркдаги қонли ҳужум ортидан кейин АҚШнинг ўша пайтдаги президенти Дональд Трамп Сайфулло Соиповни ўлимга ҳукм қилишни талаб қилган эди.
Нью-Йорк шаҳрида содир этилган ҳужумда олти нафар хорижлик сайёҳ ва икки нафар америкалик ҳалок бўлган эди. Аввалроқ судда Соипов қилмишидан пушаймон эмаслиги ва имкон қадар “кўпроқ” одамни ўлдирмоқчи бўлганини айтган.