Ўзбекистон индексда сўнгги 12-ўринда қайд этилган.
Нашр таҳлилига кўра, айни пайтда Россияга геосиёсий жиҳатдан энг яқин бўлган давлат – Беларус (11 балл). Москва билан алоқаларнинг қалинлиги бўйича кейинги ўринлардан – Арманистон (9 балл) ва Қирғизистон (8 балл) жой олган.
Рўйхатдаги кейинги давлатлар Москвага яқинлиги жиҳатдан қуйидаги кетма-кетликда жойлашган: Эрон, Тожикистон, Қозоғистон (6 балл), Сурия, Хитой, Венесуэла (5 балл), Никарагуа, Ҳиндистон, Ўзбекистон (4 балл).
Муаллифлар индексни “Путиннинг дўстлари” деб ҳам номлаган. Уни тузишда қуйидагилар асосий мезон бўлган: Дипломатик яқинлик, ҳарбий яқинлик, энергетик ва иқтисодий яқинлик.
Юқоридаги мезонлар асосида Ўзбекистоннинг БМТдаги резолюцияларда Россияга қарши овоз бермагани, шу билан бирга тарафдор ҳам бўлмагани, РФга қурол етказиб бермагани, КХШТ аъзоси эмаслиги, ўз ҳудудида рус ҳарбийларини жойлаштирмагани ва 2022 йил февралидан буён Россия билан қўшма ҳарбий машғулотлар ўтказмагани эътиборга олинган.
The Economist ўз мақоласида бу индекс давлатларнинг дипломатик позициясидаги ўзига хосликларни акс эттирмаслиги, фақат рўйхатдаги давлатлар Россияга нисбатан қандай позиция танлаганига баҳо беришини қайд этиб, бу позиция мажбурликдан танланган бўлиши эҳтимолини рад этмаган.