Озодлик радиоси турк хизматининг хабар беришича, марҳумнинг оиласи русийзабон бўлган. Улар Николай черковидан узоқ бўлмаган жойда жойлашган уйнинг биринчи қаватидаги шахсий квартирасида ўлдирилган. Оилани аввалдан таниган икки гумонланувчи 15 март куни эрталаб соат 3 лар атрофида хонадонга ўғрилик уюштирган.
Мухбирлардан бири ҳуқуқ-тартибот идораларидаги манбага таяниб хабар беришича, ҳужумчилар оила бошлиғига пичоқ билан 14 марта жароҳат етказган, унинг рафиқаси тўққизта пичоқ жароҳатидан вафот этган, 11 ёшли ўғли эса етти марта жароҳатланган. Оилага тегишли ит ҳам ўлдирилган.
Дастлабки маълумотларга кўра, гумонланувчилар Тошҳовуз вилояти (1996 йилда туғилган) ва Лебап вилояти (1998 йилда туғилган)дан келганлар бўлиб, пойтахтда таъмирлаш ишлари билан шуғулланган.
Қўшниларнинг сўзларига кўра, қотилликлар содир этилган кечада хонадондан шовқин эшитилган, бироқ ҳеч ким милицияга қўнғироқ қилмаган.
Жиноятчилар бошқа буюмлар қатори ўз қурбонларининг телефонларини ҳам олиб кетишган, бу орқали ҳуқуқ-тартибот идоралари уларни бир неча соат ичида топишга муваффақ бўлишган.
Туркманистонда сўнгги йилларда қотиллик ва ўғирлик ҳоллари тез-тез учраб туради. Аммо ИИВ жиноятчилик даражаси ва одамларни оғир жиноятларга ундаётган сабаблар ҳақида маълумот бермайди.