Террор хатари рейтингида Ўзбекистон 163 та давлат орасида 70-ўринга қўйилган. Дунёдаги террор хавфи 0 дан 10 баллгача белгиланган ҳисоботда Ўзбекистондаги террор хавфи экспертлар томонидан 1.731 га баҳоланган.
Бунгача Ўзбекистон қатор йиллар давомида террорчилик хатари мутлақо бўлмаган мамлакатлар қаторида бўлиб келган, мамлакатдаги террор хавфи нолга тенг деб баҳоланган эди.
Терроризм хавфи бўйича Марказий Осиё минтақасидаги давлатлардан фақат Тожикистондагина (50-ўрин) аҳвол Ўзбекистондагидан ёмонроқ. Туркманистон, Қирғизистон ва Қозоғистон бу йилги ҳисоботда ҳам террорчилик хавфи мутлақо бўлмаган мамлакатлар қаторида қолаверган.
Рейтингда террор хатари энг кучли деб топилган Афғонистон 1-ўринга қўйилган. Ҳисоботга мувофиқ, Бункина Фасога 2-ўрин, Сомалига эса 3-ўрин берилган.
Сиднейдаги Иқтисодиёт ва тинчлик институти томонидан ёйинланган Global Terrorism Index 2023 (Жаҳондаги терроризм индекси 2023) ҳисоботида Ўзбекистон террорчилик хавфи жуда паст бўлган мамлакатлар қаторидан жой олди.