Панжара ортида туриб очлик эълон қилган Муҳаммадкарим қамоқдан озод этилганидан сўнг овқатланишдан бош тортиш сабабини тушунтирди.
“Тергов изоляторида яқинларим юборган буюмларни қабул қилишмади. Мен куёвим Давлат Жанбўлатовдан қаттиқ хавотир олдим. Мени ҳибсга олишдан олдин на чақирув қоғози беришди ва на судга чақиришди. Миллий хавфсизлик қўмитаси ходимлари мени йўлда тўхтатиб қўлга олишди. Мен оиламдан хавотир олиб, қариндошларим билан учрашишни сўрадим, акс ҳолда очликни тўхтатмаслигимни айтдим. Аввалига улар рози бўлишмади. Кейин отам, синглим ва куёвим билан учрашиш имкониятини беришди", - деди Муҳаммадкарим.
Журналист китоб ўқиш учун бўш вақт топишига сабабчи бўлган, мамлакат президенти Қосим Жўмарт Тоқаевга «миннатдорчилик» билдирди.
Парламент мажлиси депутатлигига собиқ номзод, сиёсий мавзуларда видео контент яратган ва январь воқеаларини кен ёритган ND YouTube канали асосчиси Думан Муҳаммадкарим 21 март куни ҳибсга олинган эди.
У тинч йиғилишлар ўтказиш тартибини бузганликда, яъни ноқонуний митингга чақиришда айбланган. Айблов 20 март куни бўлиб ўтган матбуот анжуманида Муҳаммадкаримнинг сайлов натижаларидан норози эканлигини айтган баёнотига асосланган. Баёнотда журналист фуқароларни тинч намойишга чиқишга чақирди.
Бу сўнгги олти ой ичида журналистнинг иккинчи маъмурий ҳибсга олинишидир. 2022 йил октябрь ойида Қўнаев шаҳар маъмурий суди Муҳаммадкаримни митингга чақиргани ортидан тинч йиғилишларни ташкил этиш ва ўтказиш тартибини бузганликда айбланиб, 15 суткага ҳибсга олган эди.