Ташқи ишлар вазирлигига қарашли “Дунё” ахборот агентлигининг хабар беришича, бу ҳақда Ўзбекистон Бош вазирининг ўринбосари Жамшид Қўчқоров Хитой Давлат кенгаши Бош вазирининг ўринбосари Лю Гочжун билан ўтказган учрашувда қайд этилди.
Учрашув пайтида Лю Гочжун 2016-2022 йилларда Хитой компаниялари ва ҳукумати томонидан нефть ва газ излаш, тўқимачилик ва кимё саноати, инфратузилмани яратиш, транспорт, телекоммуникация ва қурилиш каби соҳаларда Ўзбекистонга 10 миллиард доллардан ортиқ сармоя киритилгани ҳақида гапирган.
“Дунё”нинг билдиришича, бундан ташқари 2022 йилда Ўзбекистонда Хитой капитали иштирокида 275 та янги корхона ташкил этилган. Бугунги кунда Ўзбекистонда Хитой инвестициялари иштирокидаги 2100 дан ортиқ корхона ишламоқда.
Ташқи ишлар вазирлиги ахборот агентлиги 2022 йил якунларига кўра, Хитой Ўзбекистоннинг иккинчи йирик савдо шериги бўлганлиги, Хитой билан савдо айланмаси қарийб 9 миллиард долларга етганини таъкидлаган.
Январь ойида Давлат статистика қўмитаси ўтган йили Россия Хитойни ортда қолдириб, Ўзбекистоннинг биринчи сонли савдо ҳамкорига айлангани ва бу икки давлат ўртасидаги савдо айланмаси 9 миллиард 279 миллион 700 минг долларни ташкил этгани ҳақида билдирган эди.
Аввалроқ 20 апрель куни Жамшид Қўчқоров бошчилигидаги Ўзбекистон делегацияси Хитойга ташриф қилгани билдирилган эди.
“Дунё”нинг ёзишича, Пекиндаги учрашувлар доирасида “турли соҳаларда икки томонлама ҳамкорликни кенгайтириш, қишлоқ хўжалигини ривожлантириш, ерлардан унумли фойдаланиш хамда ижтимоий соҳаларда Хитой тажрибасини қўллаш муҳимлигига урғу берилган”.
Хитой 2016 йилдан 2022 йилгача Ўзбекистон иқтисодиётига 10 миллиард доллардан ортиқ сармоя киритди.