Қирғизистон ҳукумати чегарада 84 килограмм олтин ушлангани бўйича тушунтириш берди.
Президент Садир Жапаров матбуот котиби Эрбол Султонбоевнинг маълум қилишича, “Олтин Кен” ширкати ходимлари олтин олиб кирмоқчи бўлган вақтида Миллий хавфсизлик давлат қўмитаси томонидан қўлга олинган.
"Мамлакатимизда 100 дан ортиқ компания олтин қазиб олади. Уларнинг аксарияти руда ва концентратларни Қозоғистон ёки Хитойга экспорт қилади ва у ерда қайта ишлаш билан шуғулланади. Сабаби бизда айрим металлардан олтин ажратиб оладиган завод йўқ. Бизда компанияларга олтинни қайта ишлаш учун экспорт қилишга қонуний рухсат берилди", деди матбуот котиби.
Султонбоевнинг сўзларига кўра, бу ҳолатда солиқларни яширишга уриниш бўлган.
“Олтин олиб кираётганда улар солиқ идораларида рўйхатдан ўтишлари ва 60 миллион сом солиқ тўлашлари керак эди, улар эса солиқларни тўлашмаган. Қанча тонна руда ва концентрат хорижга экспорт қилинаётгани буларнинг барчаси ҳисобга олинади. Компаниялар ҳам қанча олтин олиш мумкинлиги ҳақидаги тахминий лаборатория маълумотларини олади ва шундан кейингина улар қайта ишлашга олиб чиқилади”, деб тушунтирди матбуот котиби.
Унинг айтишича, ўтган йил охирида президент Қора-Балта заводига ташриф буюриб, вазирларга топшириқлар берган. Шундан сўнг у 2023 йилнинг май ойидан бошлаб бир килограмм ҳам руда ва концентрат Қирғизистонда қайта ишлаш учун хорижга экспорт қилинмаслиги тўғрисидаги фармонни имзолади.
"Афсуски, ўзимиз тайёр эмас эдик, фармон 31 декабргача узайтирилди. Завод қуришга вақтимиз йўқ, буни олти ойда қилиш қийин. Бунинг учун бюджетда маблағ ажратилмаган. Президентнинг саъй-ҳаракатлари билан олға интиламиз. Худо хоҳласа, 31 декабрда Қирғизистонда заводимизни қуриб, қайта ишлашни бошлаймиз", деди котиб хулоса қилиб.