Эрдўғоннинг сўзларига кўра, турк разведкаси ИШИД етакчиси деб аталган Абу Ҳусайн ал-Қурайшини анчадан бери кузатиб келган. У махсус хизмат томонидан 29 апрель куни ўтказилган операция давомида йўқ қилинган.
“Биз террорчилик ташкилотлари ўртасида ҳеч қандай фарқ қолдирмасдан, уларга қарши курашишда давом этамиз”, — дея қўшимча қилди президент.
Ўтган йилнинг октябрь ойида АҚШ Марказий қўмондонлиги америкалик ҳарбийлар Сурия шимолидаги ҳаво ҳужумида “Исломий давлат”нинг уч етакчисини ўлдиргани ҳақида хабар берган эди. Суриядаги етакчи ўринбосари Абу-Ҳашум ал-Умавий, шунингдек, террорчилик гуруҳининг яна бир юқори мартабали вакили йўқ қилинди.
“Исломий давлат” 2010 йиллар ўрталарида Ироқ ва Суриядаги катта ҳудудларни назорат қилган. Қўшма Штатлар ва унинг иттифоқчилари, Ироқ, Туркия армияси, Россия томонидан қўллаб-қувватланадиган Сурия ҳукумат кучлари ва Сурия қуролли мухолифатининг кампаниялари натижасида гуруҳ ўз позицияларини йўқотди ва ҳозирда ҳеч қандай аҳоли пунктларини назорат қилмайди. ИШИД тарафдорлари Африка ва Афғонистонда ҳам жанг қилмоқда.