Тақиқ сабаби ва унинг қанча муддатга киритилаётганига аниқлик киритилган эмас. “Қозоғистон темир йўллари” буйруғи транспорт ширкатларига йўлланган.
“Россия темир йўллари” ҳам 3 майдан Таманга нефть транспортировкасини тўхтатиб қўйган. Россия ширкати ҳам бунинг сабабини очиқламаган.
Мазкур қарор Тамань порти яқинидаги нефть резервуари ёниб кетганидан кейиноқ қабул қилинган. “Энг мураккаб даражадаги” дея тавсифланган ёнғин қарийб бир сутка давомида ўчирилган, аланга майдони эса 1,2 минг квадрат метрни ташкил этгани айтилган.
Reuters қайдича, Тамань порти яқинидаги нефть тушириш-юклаш терминали йилига 20 миллион тонна хом нефть, нефть маҳсулотлари ва суюлтирилган газ ўтказиш имкониятига эга. Ўтган йили Қозоғистон Тамань орқали жумладан 1 миллион тоннадан кўпроқ мазут ва 230 тоннага яқин суюлтирилган газ экспорт қилган.
Трейдерлардан учтаси агентликка терминал нефть маҳсулотлари ва суюлтирилган газни қабул қилиш ва жўнатишда давом этаётганини маълум қилган. Улардан бири порт яқинида вагонлар тўпланиб қолгани, бироқ трейдерлар 8 майга бориб вазият барқарорлашиши ва тақиқ олиб ташланишига умид қилишаётганини айтган.
Тамань шаҳри ва порти Керчь кўпригининг ёнгинасида жойлашган, у орқали Россия томонидан аннексия қилиб олинган Қрим яриморолига нефть маҳсулотлари етказиб берилади.