Times of Israel нашрининг билдиришича, бош вазир бу ҳақда “Исломий жиҳод” билан оташкесим битимига эришилганининг эртаси куни ўтган ҳукумат йиғилишида гапирган. Битим 13 май куни Миср воситачилигида имзоланган эди.
Нетаняҳуга кўра, амалиёт пайтида Исроил армияси ва “Шабак” хавфсизлик хизмати ходимлари “Исломий жиҳод”нинг 17 та қўмондонлик пунктини йўқ қилган, қурол омборларини ва танкларга қарши зарба берувчи бўлинмаларни портлатган. Нетаняҳу “ўнлаб террорчилар ўлдирилгани”ни таъкидлади. Фаластин ҳам аввалроқ “Исломий жиҳод”нинг қатор қўмондонлари ҳалок бўлганини тасдиқлаган эди.
Агентликларнинг хабар беришича, томонлар ҳозирда оташкесим битимига амал қилмоқда. Исроил 14 май куни Ғазо минтақаси билан чегарадаги назорат ўтказиш пунктлари фаолиятини қайта тиклади. Шу куни кечқурун Исроилга Фаластин томонидан ракета отилгани маълум қилинди. Кейинроқ Фаластин томони бу “техник хато” бўлгани тўғрисида баёнот берди. Исроил бунга жавобан танклардан ўқ узгани ва Ғазода ХАМАСга қарашли иккита пост йўқ қилинганини билдирди.
“Исломий жиҳод” 9 май куни Исроилга ракета ва минимёт снарядлари отгани ортидан отишмалар бошланиб кетганди. Сўнгги хабарларда қайд этилишича, бунинг оқибатида Исроилда икки киши ҳалок бўлди, ўттиздан кўпроқ киши яраланди.
Ғазо минтақаси расмийларининг билдиришича, Исроил бомбардимонлари ортидан 33 фаластинлик, жумладан олти нафар бола ҳалок бўлган.
Хавфсизлик кучлари сўнгги кунларда Ғазо минтақасида ўтказган махсус амалиёт пайтида “Исломий жиҳод” гуруҳининг олий даражадаги барча раҳбарлари жисмонан йўқ қилинди, деб билдирди 14 май куни Исроил бош вазири Бинямин Нетаняҳу.