Расмийлар аёлнинг Россияга экстрадиция қилинишини расман тасдиқламади, бироқ Мадинанинг онаси Оксана Жейлиева 13 май куни Озоди радиосига Шимолий Осетиядаги тергов изоляторида қизи билан уч ҳафта олдин гаплашганини айтди.
«Қизимга нисбатан ИШИД билан ҳамкорлик қилгани ва бу ташкилотга қўшилгани учун жиноий иш қўзғатилди. Қизимни алдашди. Мен адвокат ёлладим, энди қизимнинг айбсизлигини исботлашга ҳаракат қиляпман», - дейди у.
Аввалроқ, Мадина Бандаренко тўрт фарзанди билан бирга Тожикистонга экстрадиция қилинди. Оксана Жейлиеванинг айтишича, қизининг уч фарзанди бор, тўртинчи фарзанди эса Парвиз Саидраҳмоновнинг тожикистонлик рафиқасидан.
«Қизимнинг катта фарзанди биринчи турмушидан, у Россия фуқароси. Парвиздан эса икки қизи бор. Тўртинчи фарзанди Парвизнинг тожикистонлик хотинидан. Невараларимни қўлимга топширишларини хоҳлайман», - дейди у.
Мадина Бандаренконинг фарзандлари Тожикистонда сақланаётган жой номаълум.
Оксана Жейлиева, шунингдек, қизи Парвиз Саидраҳмонов билан 2013 йилда биринчи турмуш ўртоғидан ажрашгач, Россияда танишганини айтди.
«Кўп ўтмай у қизимга уйланди ва Абу Довуд 2017 йилда қизимни алдаб Сурияга олиб кетди», деди аёл.
2018 йилда Абу Довуд, унинг рафиқаси ва болалари турк ҳарбийлари томонидан қочиб юрган вақтида ҳибсга олинган эди. 2019 йилдан бери Тожикистон Парвиз Саидраҳмоновни экстрадиция қилишни тўрт марта сўраган, бироқ ўтган йили Туркия ҳукумати уни тожик томонига топширган. Тожикистон расмийлари Абу Довудни «ўнлаб ёшларни Сурия ва Ироқдаги жангларга ёллаган» ИШИДнинг хавфли тарғиботчиларидан бири деб билади.
Парвиз Саидраҳмонов 2022 йил 11 ноябрда Туркиядан Душанбега экстрадиция қилинганидан сўнг дарҳол 21 йиллик қамоқ жазосига ҳукм қилинди. У террорчилик, қотиллик, гаровга олиш, ёллаш, хорижий давлат ҳудудидаги жанговар ҳаракатларда қатнашиш ва террорчилик ташкилоти ташкил этишда айбланмоқда.