Украинага қарши урушнинг илк кунлари “Победа” авиаширкати учоғининг командири Владимир Н. Туркиянинг Анталия аэропортига қўнганидан кейин кабинадан чиқиб, йўловчиларга одатдагидек хайрлашув сўзларини ўрнига урушни тўхтатиш чақириғи билан мурожаат қилган эди.
“Уруш жиноятдир. Ва соғлом фикрлайдиган ҳар қандай фуқаро бу фикримни қўллайди ва уни, имкон бўлса, ҳозирнинг ўзида уни тўхтатиш учун қўлидан келган барча ишни қилади, деб ўйлайман”, деган учувчи “Бизга урушнинг кераги йўқ” дея қўшимча қилган.
Бу мурожаатдан кейин учоқ салонидагилар учувчини олқишлаганлар. Кўп ўтмай давлат авиаширкати учувчисининг урушга қарши чиқиши видеоси интернетга қўйилган, Владимир Н. эса тез орада ишдан бўшатилган.
Tgstat маълумотига кўра, учувчининг чақириғи акс этган видео қарийб 6 миллион киши томонидан кўрилган.