Дон экспорти бўйича шартноманинг амал қилиш муддати 18 май куни якунланаётган эди. Аввалроқ Россия шартномадан чиқиши тўғрисида баёнот берганди. Шартнома муддатини узайтириш борасида ўтган ҳафтада Истанбулда Украина, Россия, Туркия ва БМТ вакиллари музокара ўтказган эди.
Россия Украинага бостириб кирганидан бир неча ой ўтгач Қора денгиз орқали дон экспорт қилинишини блоклаб қўйган. Бунинг оқибатида жаҳонда озиқ-овқат нархлари қимматлаша бошлаган.
Киев ва Москва Анқара ва БМТ воситачилигида украин донини экспорт қилишни қайта тиклаш юзасидан ўтган йилнинг 22 июлида Истанбулда ўтган сўзлашувларда муросага эришганди. Ўшандан бери шартнома муддати икки марта узайтирилди. Бу орада Украинадан қатор давлатларга 30 миллион тонна ғалла ва бошқа қишлоқ хўжалик маҳсулотлари экспорт қилинди.
Украинадан Қора денгиз орқали дон экспорт қилиш шартномасининг муддати яна икки ойга узайтирилди. Бу ҳақда 17 май куни Туркия президенти Эрдўғон маълум қилди.