Reuters агентлигининг билдиришича, Британия, Германия, Италия, Канада,Франция, Япония ва АҚШ раҳбарлари Россияга нисбатан янги санкцияларни муҳокама этади. Саммитда анъанавий равишда Европа Иттифоқи раҳбарлари ҳам қатнашади.
Associated Press агентлигининг билдиришича, АҚШ саммитда иттифоқчиларни Россияга нисбатан жорий санкцияларни “икки баробарга қатъийлаштириш”га чақирмоқчи. Бундан ташқари АҚШ Россиянинг ҳарбий салоҳиятини заифлаштириш ва Украинага босқин учун масъул бўлган шахсларга жазо чораларини кучайтириш имкониятларини ўрганишни таклиф қилмоқчи.
Саммит якунида иттифоқчилар Россияга нисбатан янги санкцияларни жорий этиши кутилмоқда. Жумладан, АҚШ ўзининг янги санкцияларини эълон қилади. Унга асосан, санкциялар рўйхатига яна Россия ва учинчи давлатлардаги 70 та юридик шахс ва 300 жисмоний шахс киритилади.
Агентликлар хабарларида билдирилишича, G7 лидерлари келажакда Россия олмаслари савдосини қай тарзда чеклаш масаласига ҳам эътибор қаратади. Ҳозирча Россия олмосларига санкция жорий этилишига Бельгия қарши чиқмоқда. Бу ерда жаҳондаги энг йирик олмос савдо маркази мавжуд. Антверпендаги олмос маркази санкция жорий этилса, ўз бизнесининг 30 фоизини йўқотишини маълум қилган. Шунга қарамай, бу масалани муҳокама қилиш давом этмоқда.
Япониянинг Хиросима шаҳрида 19 май куни жаҳоннинг етакчи давлатларини бирлаштирган “Катта еттилик” (G7) лидерларининг уч кунлик саммити бошланади.