Ҳиндистонда йўталга қарши сиропларни экспорт қилишдан олдин мажбурий синовдан ўтказиш амалиёти жорий этилди. Бу ҳақда ҳукумат томонидан чиқарилган буйруқда айтилган, дея хабар қилди Reuters агентлиги. Ҳиндистонда ишлаб чиқарилган сироплар ўтган йили Ўзбекистон ва Гамбияда ўнлаб боланинг ўлимига сабаб бўлгани айтилган.
Ҳужжатга мувофиқ, йўталга қарши ҳар қандай сироп хорижий ўлкага олиб чиқилишидан олдин давлат лабораториясидан сертификат олиши лозим. Мазкур тартиб 1 июндан кучга киради, дейилган ҳукумат томонидан 22 май куни қабул қилинган ва Соғлиқни сақлаш вазирлиги тарафидан сешанба куни ёйинланган хабарномада.
Ҳиндистоннинг йилига 41 миллиард долларлик айланмага эга бўлган дори-дармон саноати дунёдаги энг йирик ишлаб чиқаришлардан бири бўлиб ҳисобланади. Мамлакатдаги учта ширкат ишлаб чиқарган йўталга қарши сиропларда Жаҳон соғлиқни сақлаш ташкилоти томонидан токсинлар топилиши ортидан бу саноатнинг обрўсига соя тушди.
Икки ширкат томонидан ишлаб чиқарилган сироплар 2022 йили Гамбияда 70 нафар, Ўзбекистонда эса 19 нафар боланинг ўлими билан боғланди.
“Йўталга қарши сиропнинг экспорт қилинишига экспорт намунаси текширилган ҳамда сертификат тақдим этилганидан кейин рухсат этилади”, дейилган Ҳиндистон савдо вазирлиги хабарномасида.
Унда миллий регулятордан сертификат олган штатлардаги лабораторияларга қўшимча ўлароқ дори-дармон намуналари юборилиши мумкин бўлган еттита давлат лабораторияси номи кўрсатилган.
Гамбияда Maiden Pharmaceuticals Ltd ширкати ишлаб чиқарган йўталга қарши сироплар текширилганда, улардан токсин топилмаган. Бироқ Marion Biotech ширкати томонидан ишлаб чиқарилиб, Ўзбекистонга етказиб берилган кўплаб препаратларда ифлослантирувчи моддалар аниқланган.
Reuters агентлиги ўтган ҳафтада Ҳиндистон фармацевтика саноатига нисбатан ўз сиёсатини ўзгартириш имкониятларини кўриб чиқаётгани, жумладан йўталга қарши сироплар экспертизаси ва дори-дармон хомашёси текширилишини кучайтиришни режалаётгани ҳақида хабар қилган эди.
Соғлиқни сақлаш вазири ва давлат бошқарув органлари “болалар ўлимига сабаб бўлаётган йўталга қарши сироплар экспорти муаммосини ҳал қилиш учун” жорий йил бошида Ҳайдаробод шаҳрида учрашув ўтказишган.
Ўзбекистонда “Док-1 Макс” препаратини қабул қилгани ортидан 20 нафар бола вафот этгани ҳақида Озодлик аввалроқ хабар қилган эди. Ҳолат бўйича ДХХ Тергов бошқармаси томонидан “Quramax Medikal” МЧЖ ҳамда “Дори воситаларини стандартлаштириш илмий маркази” масъул шахсларига нисбатан жиноят иши очилган.
Кейинроқ мазкур дорини Ҳиндистондан олиб келган “Quramax Medikal” ширкатига берилган лицензия бекор қилинган.