“Мен сизларга таъзия билдириш учун келдим. Бу халқимиз учун катта фожиа, йўқотиш бўлди. Бу оғир кунларда бардам бўлинглар. Мен сизларга ҳамдардман. Ҳукуматга молиявий жиҳатдан зарур бўлган барча ёрдамларни кўрсатишга топшириқ бердим. Ҳукуматга ёки шахсан менга мурожаатингиз бўлса, айтинглар. Ҳаммасини бажарамиз”,- деди Тоқаев.
Экология вазирлигининг билдиришича, ёнғинни ўчиришга жалб қилинган 14 ўрмончи билан алоқа 9 июнда узилган. Шундан сўнг уларни қидириш-қутқариш ишлари бошланган эди. Ҳалок бўлганлардан бир нафари аёл.
Ёнғин ҳудуди 60 гектарни ташкил қилмоқда. Фавқулодда вазиятлар вазирлиги ҳавонинг иссиқлиги ва шамол ёнғин ўчирилишига ҳалақит бераётганини маълум қилди.
11 июндаги маълумотга кўра, ҳозирда бешта ҳудудда ёнғин ўчирилган. Ўтни ўчиришга Фавқулодда вазиятлар вазирлиги, Ўрмон ҳўжалиги қўмитаси, маҳаллий органлар ва Мудофаа вазирлигининг 1500 ходими, 290 дан ортиқ техника жалб қилинган.
10 июнь куни президент Тоқаев Юрий Ильинни фавқулодда вазиятлар вазири лавозимдан бўшатди ва унинг ўрнига Сирим Шарипхановни тайинлади.
Ўзбекистон президенти Шавкат Мирзиёев 12 июнь куни ҳамкасби Қасим-Жомарт Тоқаевга ва Қозоғистон халқига таъзия йўллади.