Агар Тошкент мазкур рейтингда 2022 йили 144-ўринни эгаллагани эътиборга олинса, ўтган бир йил мобайнида 53,9 балл йиққан шаҳарнинг 13 поғонага қуйилагани маълум бўлади. Бу пастлаш ортидан Тошкент турмуш кечириш учун энг ноқулай шаҳарлар йигирматалигига кириб қолган.
Рейтингда биринчи ўринга Австрия пойтахти бўлмиш Вена қўйилган. Таҳлилчилар фикрича, Вена барқарорлик, юқори сифатли таълим, соғлиқни сақлаш тизими, инфратузилма ишончлилиги, маданият даражасининг юқорилиги, кўнгилочар жойларнинг кўплиги каби жиҳатларни ўзида жам қилолган шаҳардир. Мазкур шаҳар ўтган йили ҳам рейтингда биринчи ўринни эгалланганди.
Рейтингда иккинчи ўринда Дания пойтахти Копенгаген, учинчи ўринда эса Австралиянинг Мельбурн шаҳри келган. Шунингдек, дастлабки ўнликка Сидней (Австралия), Ванкувер, Цюрих, Калгари, Женева, Торонто, Осака ва Окленд шаҳарлари кирган.
Рейтингда яшаш учун энг ноқулай шаҳар ўлароқ Сурия пойтахти Дамашқ (173-ўрин) кўрсатилган. Дамашқ сўнгги 10 йилдан буён турмуш кечириш учун энг ёмон шаҳар сифатида эътироф этиб келинган. Шунингдек, Ливиянинг Триполи (172-ўрин), Жазоирнинг Жазоир (171-ўрин), Нигериянинг Лагос (170-ўрин) ва Покистоннинг Карачи (169-ўрин) шаҳарлари жаҳондаги энг ноқулай шаҳарлар ўлароқ саналган.
The Economist Intelligence Unit томонидан тақдим этилган The Global Liveability Index 2023 (Яшашга яроқлилик бўйича глобал кўрсаткич) рейтингида Ўзбекистон пойтахти жаҳондаги 173 та шаҳар орасида 157-ўринга қўйилди.